lunes. 05.12.2022

Os alumnos do CEIP Bibei desfilan polas rúas de Viana do Bolo

Os pequenos estiveron acompañados polos boteiros e polos seus compañeiros do IES Carlos Casares. Os estudantes desfrutaron dunha comida típica do Entroido no comedor do centro escolar

Con motivo do xoves de comadres, os alumnos do CEIP Bibei de Viana do Bolo retomaron o seu desfile de Entroido polas rúas do municipio. Este ano a temática do centro foi o Camiño de Santiago e os familiares dos pequenos puideron gozar da festividade na rúa principal do concello.

«Hoxe é un día moi especial, é algo que forma parte da nosa identidade, hai moita implicación dos compañeiros e queremos volver á normalidade con estas actividades. O desfile vai virar en torno ao camiño de Santiago, xa que temos un proxecto de centro chamado “Viana no camiño”», destacaba a directora do colexio, Paqui Rodríguez.

Durante o desfile, os pequenos estiveron acompañados polos boteiros —que foron presidindo o traxecto— e polos seus compañeiros do IES Carlos Casares, que desfilaron ata a praza do concello. Ademais, os alumnos gozaron dunha comida típica do Entroido no comedor do centro escolar.

Nacho Lindoso, coordinador de actividades extraescolares, explicaba que o Entroido vense celebrando durante toda a semana. «Os alumnos deben vir con determinados elementos que a coordinadora lles pide».

Os estudantes do primeiro ciclo ían disfrazados da mascota do Xacobeo, mentres que os de segundo ciclo ían de peregrinos e Cabaleiros da Orde de Santiago. Os rapaces do terceiro encargáronse do folión.

“Viana no Camiño”

O proxecto "Viana no Camiño" xurdiu nun primero momento do Departamento da Biblioteca do centro escolar e, posteriormente, foise implicando ás titorías. O programa consiste en realizar 100 quilómetros do Camiño de Santiago.  

Os alumnos realizaron unha primeira etapa no primeiro trimestre, outra no segundo e finalizarán o traxecto no terceiro. O Camiño partiu dende Sanabria polo Ruta da Prata ata chegar á Praza do Obradoiro, onde obterán a compostelá.

Os alumnos do CEIP Bibei desfilan polas rúas de Viana do Bolo