Aínda que Manuel Corzo anunciara que non se volvería a presentar ás eleccións tras trinta anos na alcaldía, o Concello de O Bolo rematou o 2022 con diversidade de obras e comeza o 2023 con varios proxectos.
con diversas iniciativas arredor do museo de Yosso, As Ermidas, alumeado e diversas obras
Un 2022 no que a cultura e as obras foron protagonistas
É así que no 2022 inaugurouse o museo de Yosso de Valbuxán, sendo o único museo existente en Valdeorras «Tiñamos moi pouco presuposto pero fixémolo», recoñece o ata agora alcalde.
Realizáronse arranxos no santuario das Ermitas, como a construción dun bancal por mor das gretas. «Foi debido ao peso do lousado case seguro», explica Manuel Corzo. Así, esta obra tivo unha partida de 1.300.000 euros, e foi inaugurada polo conselleiro de Cultura, Román Rodríguez. Ademais, hai un proxecto feito cunha partida de 700.000 euros máis.«Eu como alcalde dígolle a todos os que poidan, que veñan visitalo porque paga a pena», afirma Manuel Corzo.
Outro punto importante é a colocación de alumeado con luces LED. «Eu penso que o Bolo foi dos primeiros concellos que instalou LED», afirma Corzo. Comezouse por Buxán, Tuxe, Outardepregos, e seguiuse con Chandoiro e Celavente. Despois xa se fixo nas 24 aldeas que compoñen o concello.
Os piares da ponte de Barxa compoñen unha loita do alcalde para ser, por fin, arranxados. Estes piares viñéronse abaixo por abrir a presa de Santa Eulalia, que non foi capaz de soportar a auga que viña do encoro de Prada.
En canto á mellora de camiños e estradas, o concello fíxose cargo da estrada que comunica Cambela e o Bao, cun importe de 93.000 euros. Tamén hai obras adxudicadas e pendentes de inicio como é a estrada de San Pedro a Paradela, de Paradela ao límite coa Veiga, e despois de San Pedro a alto da Xigua. En Outardepregos, tamén está pendente a súa rehabilitación e puxéronse adoquines na parte da igrexa.
Varios proxectos para este 2023
Porén, non todo é pasado, senón que para este 2023 están previstas diversas iniciativas e proxectos. Outras, como o Centro Social de Celeirós, acábase de rematar. «Dos 28 pobos, só tres están sen centro social: San Pedro, Xava e Paradela», afirma Manuel Corzo.
Así, para obras municipais, están asignados arredor de 100.000 euros. Unha destas obras é o arranxo do acceso ás viñas nos bancais da beira do encoro do Vao, en Buxán. «Fíxenos hai 25 anos e están deteriorados», explica o alcalde, «nestes días limpáronse as cunetas (3km ou máis) e imos arranxar as fochancas, cun custo de 12.000 euros aproximadamente».
Ademais, en canto a arranxo de camiños, vanse levar a cabo en Chamuel (Cambela), Buxán ou Vilaseco. Neste último será o acceso o que se arranxe, aínda que “hai catro persoas vivindo pero imos investir 16.000 euros”, afirma Manuel Corzo.
Outro proxecto importante é o alumeado no barrio de Veigaflorida. «Fixemos unha valoración de alumeado de Valdanta, xa que faltou un cacho por alumear en obras anteriores, e investiremos 6.400 euros», explica Corzo.
En Chandoiro existe unha aira ao lado do centro social, e Manuel Corzo afirma que a súa vontade e rehabilitala para poñer un parque para os máis pequenos. Rehabilitación que tamén quere levar a cabo no castelo do Bolo, xa que a última foi no ano 2000 e “as cousas vanse deteriorando”. Ademais, acábase de conceder ao concello un tractor desbrozador.
Última Festa da Vitela e último Festival do castelo como alcalde
Para Manuel Corzo, este ano é a súa Festa da Vitela e o seu Festival do Castelo como o alcalde. “Se a queren continuar que a continúen”, afirma, “eu fixen o que puiden, e estou contento de ser alcalde do concello do Bolo, e de Chandoiro, que é o meu pobo”.
