domingo 22/5/22

Gema Fernández Vizcaya, toda unha vida dedicada á biblioteca da Rúa

A bibliotecaria que leva máis de 45 anos mergullada nos libros recorda oito alcaldes desde que colleu o cargo e cambiou até catro veces de ubicación 

Foi en outubro de hai 45 anos cando Gema Fernández Vizcaya comezaba o seu labor como bibliotecaria na Rúa. Apaixonada do seu traballo, acabou dedicando toda a súa vida aos libros e a cultura da que se despide para dar paso á súa xubilación.  

O seu labor como bibliotecaria comezou no ano 1977 cando, ao finalizar os seus estudos de bacharelato, decidiu atender a biblioteca que naquel entón ocupaba unha aula do CEIP Manuel  Respino. Coa construción do novo Concello, o espazo pasou á planta baixa do edificio, dando paso a unha sala máis nova e máis ampla.

somoscomarca_gemafernandez_biblioteca_arua_07_05_2022 (4)
Gema co libro de contos de Francisco Delgado

Pero, foi no ano 1992 cando a biblioteca volveu mudar de lugar ata o edificio de Cultura, onde ocupaba dúas salas. Con todo, uns anos despois cambiou á actual localización, dando paso a un espazo máis amplo e con máis servizos acordes á época, como o acceso aos ordenadores e internet.  

Co paso dos anos, a profesión cambiou moito e as novas tecnoloxías facilitáronlle o traballo. «As fichas do libro facíanse a man, eran un rectángulo e íanse catalogando libro por libro. Despois, coa máquina de escribir facíanse as fichas e metíanse nun ficheiro», explicaba.

Pero, como lembraba, tamén cambiou a demanda dos lectores e os servizos da área. «Os libros que máis se recorrían eran as enciclopedias e agora case non teñen importancia porque se emprega o copia- pega e xa van ao ordenador para buscar. Agora prestamos servizo de ordenadores e internet potente e veñen cos seus portátiles para estudar».

somoscomarca_gemafernandez_biblioteca_arua_07_05_2022 (13)
O libro másis caro que posúe a biblioteca ten unhas láminas que contempla Gema

E é que o espazo da biblioteca foi evolucionando co tempo. De feito, «agora estamos na rede de bibliotecas e alguén que busque algún libro xa sabe en que biblioteca está». Con este sistema, os bibliotecarios poden coñecer se o usuario está penalizado por non devolver algún exemplar ou polo seu deterioro nalgún outro centro porque, como lembraba entre risas, «houbo xente que me dixo que llo mordeu o can».

somoscomarca_gemafernandez_biblioteca_arua_07_05_2022 (12)
Este é un dos máis antigos e a singularidade é que ten publicidade do scomercios da Rúa da quel entón

A bibliotecaria non quixo esquecerse de todas as persoas que doaron nalgún momento exemplares á o centro. «Teño que  lenbrar ás persoas que doaron á biblioteca: Ramón Quiroga, Xesús González, Diego Alonso, Iñigo, Miriam, Asunción Arias, Concello de Petín, Toño Blanco, Chavito, José Ares, Domingo Docampo, entre moitos outros».

somoscomarca_gemafernandez_biblioteca_arua_07_05_2022 (3)
No espazo de literatura infantil

«A biblioteca xa non pode definirse soamente como un espazo que garda un conxunto de libros organizado. Hoxe temos que ver a biblioteca pública coma un espazo cultural, centro de entretemento, informativo, formativo educativo e lúdico aberto a tódolos sectores sociais, no que os libros xa non son a única fonte de información», aclara Gema a micro pechado.
«É preciso poñer en valor a biblioteca para dar resposta e atender as necesidades dos usuarios, son a razón de ser das bibliotecas, sin eles, perdería o seu sentido de centros de entretemento cultural, evasión e información», engade.

somoscomarca_gemafernandez_biblioteca_arua_07_05_2022 (6)
Entre libros de autores valdeorreses fixemos a entrevista Gema Fernández

«As bibliotecas públicas prestan os seus servizos sobre a base de igualdade de acceso de todalas persoas, independentemente da sua idade, raza, sexo, relixión, nacionalidade, idioma ou condición social», subliña.

somoscomarca_gemafernandez_biblioteca_arua_07_05_2022 (10)
Sira de María Dueñas, un dos máis lidos

Os servizos que a día de hoxe presta a biblioteca da Rúa son: Préstamo a domicilio, lectura en sala, prensa diaria, internet, ordenadores e terminales de acceso público, información bibliográfica, fondo local, reprografía, hemeroteca, catálogo Online e o  propio espazo, coma punto de encontro ou espazo polivalente.

somoscomarca_gemafernandez_biblioteca_arua_07_05_2022 (1)
Recoller, colocar, mirar que todo ten onde ten que estar

O labor de Gema foi imprescindible na biblioteca da Rúa e así llo quixeron facer ver o pasado luns, 2 de maio, cando o alcalde do Concello, Álvaro Fernández, facíalle entrega dunha placa con un texto gravado de Rosalía de Castro. E, é que despois de dedicar toda unha vida a dar servizo no espazo bibliotecario, Gema xa ten ocupación en mente que, como a autora galega pola que ela ten devoción —Rosalía de Castro—, o seu tempo libre irá dedicado ao seu pequeno horto. «Xa plantei unha árbore» explicaba entre risas. E, nos animabámola a escribir un libro, aínda que foro coas vivenzas de 45 anos entre libros, de seguro que daban para moito.

somoscomarca_arua_gemacebey_homenaje_bibliotecaria_jubilacion_2022_05_02 (1)
Coa placa que lle entregou o Concello cos versos de Rosalía de Castro

Pechamos este «libro» non sen antes agradecer a Gema a súa dedicación e profesionalidade ao longo da súa vida. Desexámoslle unha bonita xubilación desfrutando dos dela e coma non cun libro entre as mans.

A conversa mantida con gema Fernández Vizcaya podes reproducila na seguinte ligazón:

Gema Fernández Vizcaya, toda unha vida dedicada á biblioteca da Rúa