Vilamartín de Valdeorras reuniu a case que medio cento de mulleres e homes que se concentraron diante do Concello
A cor morado tinguiu a praza do Concello de Vilamartín onde se puideron ver dúas grandes pancartas: unha colgada no balcón que anunciaba tan sinalado día y outra collida polas mulleres presentes no acto, na que se lía: «Mulleres de Valdeorras, vivas, ceibes e iguais».
Iria López Müller da Asociación Feminista de Valdeorras foi a encargada de ler o manifesto no que se explicaba que o seu paro era para: «Denunciar o réxime capitalista e patriarcal que oprime e somete a metade da humanidade e explota a terra ata a súa extenuación».
Expuxo que se unían á folga feminista para reclamar unha igualdade real que cambie a vida das mulleres para sempre, baixo o lema, «por todas as mulleres, por todos os dereitos, revolta feminista».
O alcalde de Vilamartín, Enrique Álvarez Barreiro e varios concelleiros do grupo de Goberno, así como, o da oposición e recentemente anunciado candidato a alcaldía polo PP José Pinto, estiveron presentes na convocatoria.
No manifesto, fíxose referencia as manadas que violan, e reivindicouse rematar co paro e precariedade laboral das mulleres así coma coa fenda salarial a explotación que supón a dobre xornada dentro e fora da casa ou o acoso no traballo. A educación baseada no respecto as mulleres e que esta sexa pública, laica, gratuíta, non sexista e inclusiva, foi outra das demandas.
Ao remate chamada a revolución feminista, a solidariedade entre as mulleres con cantos en versión feminista de «Bella ciao» o canto popular italiano das traballadoras dos arrozais, cuxa popularidade débese a que foi adoptado, con outra letra, polos partisanos.
Se queres ver o vídeo completo do Manifesto fai clic na seguinte ligazón:
Asociación
Feminista de Valdeorras
É unha comisión que
está integrada por 15 mulleres de todos os puntos da comarca, de Vilamartín de
onde é Iria, A Rúa ou O Barco. «Estamos intentando crecer e que haxa movementos
autónomos en cada concello e que despois podan confederarse, traballar xuntas e
ter moita máis forza», indicaba Iria.
Polo momento, segundo informaba Iria, están intentando xuntarse por que aínda non teñen a suficiente forza para que cada concello teña representación. Fan reunións en diversos puntos, de momento non teñen unha sede, aínda que xa se reuniron en San Miguel de Outeiro, no Barco e en Vilamartín, está pendente A Rúa. Xúntanse nos centros sociais dos pobos e entre os proxectos próximos está o que ten que ver co «Caso Carioca», a trata de mulleres, que se está xulgando en Lugo.
Vídeo dos cánticos de Bella Ciao ao remate da lectura do manifesto: