Córgomo non deixou indiferente a ninguén. Onte a vila natal de Florencio Delgado Gurriarán converteuse nunha festa para celebrar ao autor, pero tamén a unión dun pobo. Son moitos os que fixeron posible que As Letras 2022 se celebrasen en Valdeorras. «Aquí estivemos todos», aseguraba o alcalde, Enrique Álvarez Barreiro.
E é que tras a resaca de emocións, toca facer balance do que foi unha xornada perfecta. Lembra o rexedor como hai catro días reuníanse cos veciños para contarlles como sería esta celebración. «A ilusión que se desprendeu nese momento era total. Cada veciño e veciña sabía que tiñamos que ser anfitrións da xente que viñese». E así foi.
Porque o Día das Letras en Valdeorras foi o día dos veciños. «Cando lle propuxemos a Víctor Freixanes —presidente da RAG— facer o acto nun espazo público onde entrase todo o mundo, revivindo o espírito coa Florenciada, faltoulle darme un abrazo, porque é o que quería. O listón quedou moi alto e macháronse sorprendidísimos. Nunca na vida fíxose nada neste sentido».
Os alcaldes e representantes institucionais deixaron á marxe as cores políticas, unidos nesta festa onde o protagonista era Florencio, pero tamén a comarca de Valdeorras. «Neste tipo de cousas temos que estar todo xuntos. Demostrouse cando hai seis anos unímonos para conseguir As Letras. Este tipo de cousas emocionan e fanche ver que iso é o que temos que facer».
Agora, unha vez que Valdeorras quedou posto no mapa cultural grazas ao fío que puxo Florencio, «toca tirar. Temos que coller ese fío e tirar. Politicamente e tamén desde a industria. Vaise situar no mundo adiante».
Florencio volveu a Córgomo no día das súas letras e impregnou a súa vila natal co seu espírito, proba de elo foi a «Florenciada», festa ca que rematou o día e, da que Florencio se sentiría orgulloso. Conversas entre amigos, unión dun pobo, brincadeira, música e, viño.
