A cita está organizada pola área de Deportes do Concello de Quiroga co patrocinio de Oroso Club Ciclista e Vitaldin Sport. O evento foi presentado polo alcalde, José Luís Rivera, o concelleiro de Deportes, Antonio Marcos, o presidente do Oroso Club Ciclista, Celestino González, e dous ciclistas locais que tamén tomarán a saída.
A competición dará comezo ás nove da mañá nas inmediacións da casa consistorial, punto que tamén acollerá a meta. Haberá dúas modalidades:
• Bike Marathon, cun percorrido de 45 quilómetros e 1.400 metros de desnivel positivo.
• Bike Extreme, cun itinerario máis esixente de 67 quilómetros e 2.400 metros de desnivel positivo.
Trátase dunha proba non federada na que se poderá competir de forma individual ou en parella. Nesta última modalidade establécense varias categorías: Masculina (equipos con suma de idades igual ou inferior a 80 anos), Veteranos (máis de 80 anos), Feminina (dúas mulleres) e Mixta (un home e unha muller).
O prazo de inscrición pechouse con 160 ciclistas rexistrados, que percorrerán un trazado maioritariamente por pistas forestais. O itinerario permitirá gozar dunha paisaxe espectacular, pasando por lugares emblemáticos como As Eiras, as Terras Negras, Reboledo, o Rego das Forcadiñas ou o Alto do Boi.
