Preto de 350 persoas sumáronse este xoves á primeira edición da «Noite de Estrelas», unha andaina nocturna e solidaria organizada polo Concello de Quiroga en apoio á Asociación Española Contra o Cancro (AECC). O evento, que mesturou deporte, paisaxe e compromiso social, recadou un total de 1.487 euros que foron entregados á entidade a través dun cheque simbólico.
A iniciativa partiu da área de Deportes do Concello, que decidiu apostar por un novo formato seguindo a estela doutros eventos nocturnos como a Night Trail e a Night Run, pero centrado exclusivamente nunha andaina apta para todos os públicos. A inscrición tiña un custo simbólico de 5 euros para adultos e 3 euros para menores de 15 anos.
A saída tivo lugar na Praza de España, desde onde os participantes iniciaron un percorrido de sete quilómetros considerado de dificultade baixa. A ruta incluíu puntos emblemáticos como a rúa Real, a Praza Maior, Pacios de Mondelo, o camiño do Regueiral, a Ermida, San Vitoiro e a pista do monte da Conchada, antes de regresar ao centro da vila.
Durante preto de dúas horas, os camiñantes gozaron das vistas nocturnas de Quiroga nun ambiente de convivencia marcado polo bo tempo e a solidariedade. A actividade logrou unir veciñanza e visitantes arredor dunha causa común: contribuír á loita contra o cancro a través do deporte. Desde o Concello amosan a súa satisfacción pola alta participación e anuncian que xa se traballa na continuidade deste evento o próximo ano.
