As historias tamén son unha maneira de percorrer un territorio. De descubrir os seus camiños, as súas xentes e esa memoria que durante xeracións viaxou de boca en boca. Esa será a esencia da xornada que vivirá a aldea de Vieiros, no Courel, o vindeiro 10 de xullo coa chegada do Festival Internacional de Narración Oral Atlántica.
O Concello de Quiroga participa por primeira vez como colaborador neste encontro, considerado o maior festival de narración oral e contacontos de Galicia, levando ata unha das súas aldeas unha programación que une palabra, patrimonio e natureza.
Atlántica naceu en Santiago de Compostela no ano 2013 e desde entón foi medrando ata converterse nunha cita internacional que achega a narradores e narradoras a espazos singulares de toda Galicia. Nesta edición reúne 64 artistas en 33 localidades, con participantes galegos e tamén chegados de lugares como Portugal, Colombia, Huelva, Zamora ou Navarra.
Un dos valores deste festival é precisamente a descentralización da cultura, levando actividades ás catro provincias e achegándoas non só ás cidades, senón tamén ás pequenas vilas e parroquias rurais.
Un roteiro para escoitar a montaña
A programación en Vieiros comezará ás 17:00 horas coa actividade «A fala da montaña», organizada por Miudiño Sociedade Cooperativa.
Trátase dun roteiro ecolóxico pensado especialmente para público familiar no que, a través da observación, o xogo e a narración oral, os participantes poderán descubrir a contorna da aldea.
Durante o percorrido poñerase en valor a riqueza da paisaxe, a natureza, o patrimonio local e tamén esas historias e lendas que forman parte da identidade da montaña. Unha proposta para mirar o territorio con outros ollos e fortalecer o vínculo coa contorna.
Xa pola tarde, ás 20:00 horas, será a quenda de María da Pontragha e Miguelón Paz coa sesión «Contos de tascas, tabernas e outros tugurios».
Serán historias nacidas arredor das conversas de taberna, con personaxes populares, vivencias cotiás e relatos compartidos entre veciños, deses que forman parte da tradición oral dos pobos.
As dúas actividades desenvolveranse na Aira de Vieiros.
Transporte gratuíto desde Quiroga
Para facilitar a participación nesta xornada cultural, as Concellerías de Dinamización Lingüística e Participación Cidadá do Concello de Quiroga organizarán un desprazamento gratuíto en microbús.
A saída será o venres 10 de xullo ás 15:45 horas desde a Casa da Cultura de Quiroga e o regreso está previsto arredor das 22:00 horas. As persoas interesadas deberán reservar praza chamando ao teléfono 657 014 555. Os menores terán que acudir acompañados dunha persoa adulta.
O concelleiro Xosé Manuel Fernández anima tanto á veciñanza como aos visitantes a participar nesta iniciativa e destaca a importancia deste tipo de propostas que «levan a cultura ao rural poñendo ademais en valor a vida e o patrimonio histórico e natural das nosas aldeas».
Unha xornada na que Vieiros volverá demostrar que as pequenas aldeas tamén son grandes escenarios cando se trata de compartir cultura, memoria e historias.
