Freixido de Abaixo celebrou este 19 de marzo a festividade de San Xosé cunha xornada marcada pola tradición relixiosa e o ambiente festivo na contorna da súa pequena capela.
O templo, construído na primeira metade do século pasado, é un dos elementos máis singulares do lugar. Ao longo dos anos foi obxecto de diversas obras de restauración que permitiron conservar a súa estrutura orixinal. Conta cunha única nave, con muros de pedra tradicional da zona, revestidos e cun acabado cromático, e unha cuberta a dúas augas con lousa como material principal.
Entre os seus elementos máis característicos destaca a espadaña, situada de forma paralela sobre o alzado de maior dimensión, así como a porta de acceso, pouco diferenciada na fachada principal.
A xornada comezou coa misa solemne ás doce do mediodía, que estivo amenizada polo grupo tradicional Raiola Son, encargado tamén de poñer música á sesión vermú posterior.
A celebración continuará o sábado 21 cunha nova xornada festiva, que incluirá festa e verbena coa orquestra Conexión, completando así un programa que combina relixión, música e convivencia veciñal.
