O Barco de Valdeorras volverá sumarse este venres, 16 de maio, á conmemoración do Día da Enfermidade Celíaca coa iluminación en cor azul da fachada do edificio vello do Concello.
A iniciativa forma parte da campaña promovida pola Asociación de Celíacos de Galicia, á que se adheriron numerosos concellos galegos co obxectivo de visibilizar esta enfermidade e reivindicar o dereito á inclusión das persoas que a padecen.
A iluminación permanecerá activa entre as 20.00 e as 00.00 horas, aínda que desde o Concello recomendan agardar ata as 21.00 ou 21.30 horas para poder realizar fotografías co efecto lumínico xa visible.
A celiaquía é unha enfermidade sistémica de base autoinmune provocada polo glute e outras proteínas relacionadas en persoas xeneticamente susceptibles. Estímase que arredor do 2 % da poboación europea é celíaca, unha circunstancia que obriga a seguir de maneira estrita unha dieta sen glute durante toda a vida.
Desde o Concello do Barco destacan a importancia de seguir avanzando na inclusión social e laboral das persoas celíacas, lembrando que moitas relacións sociais xiran arredor da comida, o que pode provocar situacións de exclusión tanto en nenos e nenas como en persoas adultas.
Con este xesto simbólico, O Barco únese así a unha xornada de sensibilización que busca dar visibilidade á enfermidade e fomentar unha sociedade máis accesible e inclusiva para todas as persoas.
O Barco de Valdeorras12.4 °Cnubes
