A enfermería ourensá celebra desde este luns 11 de maio a súa “semana grande” cun amplo programa de actividades formativas e científicas que terá como acto central as XV Xornadas de Enfermería, consideradas as máis veteranas de Galicia. A programación, baixo o lema «Da vocación ao liderado: a enfermería que vén», esténdese este ano por primeira vez aos tres hospitais públicos da área sanitaria: Ourense, Verín e Valdeorras.
No caso do Hospital Público de Valdeorras, a actividade arranca xa este luns cun obradoiro centrado na abordaxe das feridas clínicas complexas. A sesión será impartida por Olga Barredo González, enfermeira referente en feridas crónicas e profesional da Unidade de Reanimación.
A iniciativa busca achegar a formación tamén aos hospitais comarcais e aos equipos de atención primaria, facilitando a participación dos profesionais sen necesidade de desprazarse ata Ourense. Deste xeito, O Barco convértese tamén nun dos escenarios desta semana dedicada a poñer en valor o papel da enfermería no sistema sanitario.
A Área Sanitaria de Ourense, Verín e Valdeorras destaca que esta edición supón “un paso máis” na evolución das xornadas, cun formato ampliado e unha programación máis extensa. Ademais das actividades prácticas nos distintos hospitais, o acto central desenvolverase o martes 12 de maio no Auditorio Municipal de Ourense, coincidindo co Día Mundial da Enfermería.
As xornadas abordarán cuestións relacionadas coa atención hospitalaria e comunitaria, a saúde mental, a investigación, a innovación, a humanización ou a autonomía profesional. O programa inclúe conferencias, mesas redondas, presentación de comunicacións e espazos de diálogo con profesionais, pacientes e asociacións.
Entre os relatorios previstos tamén figura a participación do catedrático e director da Fundación Pública Galega de Medicina Xenómica, Ángel Carracedo, encargado da conferencia de clausura.
As Xornadas de Enfermería de Ourense teñen a súa orixe no ano 1998 e consolidáronse co paso do tempo como unha das principais citas profesionais do sector en Galicia, só interrompidas durante a pandemia. Nesta edición, a organización pon o foco nos novos retos da profesión, o liderado nos coidados e o avance da investigación enfermeira.
