Os descubrimentos da historia da guerrilla nos montes de Casaio achados na Cidade da Selva, así coma nos novos chozos descubertos, expóñense no Casino do Barco trala presentación e charla de Carlos Tejerizo —Instituto de Ciencias do Patrimonio (Incipit)— e Alejandro Rodríguez —Universidade de Santiago de Compostela—. O acto estivo presentado por Aurelio Blanco Trincado — presidente do Instituto de Estudios Valdeorreses— acompañado por José Fernández da sección de arqueoloxía do devandito instituto valdeorrés.
Máis dun cento de persoas acudiron a charla previa onde o historiador Alejandro Rodríguez, membro do grupo de Investigación sputnik Labrego relatou a historia das xentes que se refuxiaron nos montes de Casaio, así coma os traballos levados a cabo para recuperar os obxectos que, poderán verse até o 30 de novembro no segundo andar do Casino do Barco, de 19:00 a 21:00 horas.
Estes «tesouros» xa estiveron expostos nas escolas de Casaio e constitúen unha das coleccións máis importantes asociadas a este tipo de movementos de toda a Europa Occidental.
