Este domingo, 27 de marzo, presentábase en Vilamartín o libro «Florencio Delgado Gurriarán. Unha antoloxía poética». A obra, de Editorial Galaxia, é unha selección de poemas realizada por Margarida Pizcueta e Débora Álvarez, impulsoras do proxecto As Letras de Florencio, e que inclúe un prólogo de Víctor Freixanes, Presidente dá Real Academia Galega.
Enrique Álvarez, alcalde do municipio, foi o encargado de abrir o acto agradecendo a todos os presentes por asistir, pero en especial ao presidente da RAG. Mentres, Pizcueta e Álvarez destacaban que «esta antoloxía foi un proxecto continuado e, aínda que nós fomos as que traballamos un pouco máis, é de todos. Esta antoloxía é valdeorresa, porque o proxecto é valdeorrés e o autor tamén. E, porque se presenta na vila que o viu nacer».
A coordinadora do proxecto As Letras de Florencio, Débora Álvarez, agradecía «inmensamente» que o encargado de realizar o prólogo da obra fose Freixanes e afirmaba ser «unha honra para todos». Ademais, na presentación atopábase Francisco Castro, director da Editorial Galaxia, e Aurelio Blanco Trincado, presidente do Instituto de Estudos Valdeorreses.
Pola súa banda, o presidente da RAG recoñecía que «o Día das Letras Galegas non se dedica a calquera poeta. E, cando viñeron visitarme do Instituto de Estudos Valdeorreses, vimos que había que poñer en circulación a obra de Florencio, que iso era fundamental. O que non se coñece non se ama, e Florencio era un descoñecido, non para os estudosos da literatura galega, pero tampouco estaba accesible ao público».
Roteiro arqueolóxico
Previamente á presentación, levouse a cabo un roteiro arqueolóxico por algúns dous vestixios históricos que se atopan nos arredores de Vilamartín. Guiado por José Fernández, presidente dá Sección de Arqueoloxía do IEV, o roteiro partía as 11.00 da mañá do CEIP Manuel Folla Respino.
«A verdade que foi moi interesante, porque Pepe estivo a ensinarnos pedras de aquí, de Galicia. Tamén onde está aloxado o ouro e vimos pebidas de ouro collidas aí, en A Pala. Despois fomos andando ata os petroglifos e a verdade é que participamos unhas 50 ou 60 persoas, tivo gran participación», explicaba Margarida Pizcueta.
