Este fin de semana, o Orfeón Valdeorrés trasladouse a Logroño para celebrar Santa Cecilia, patroa dos músicos, nunha viaxe chea de momentos inesquecibles, cultura e, sobre todo, música. Durante dous días de convivencia, os membros do orfeón tiveron a oportunidade de visitar Santo Domingo de la Calzada e descubrir os encantos da capital rioxana, nun ambiente de amizade e bo ánimo.
O momento máis destacado da viaxe foi a interpretación da misa "Valdeorras" na concatedral de Santa María de la Redonda. A actuación foi recibida con grande afecto polo vicario, D. Víctor Jiménez, quen amosou o seu agradecemento e eloxiou tanto a beleza da obra como a sensibilidade e o coñecemento musical do seu autor, José Ramón Mansilla, director do Orfeón Valdeorrés. «A misa soou brillante, chea de corazón», destacaron os integrantes do grupo tras un emotivo recital.
Preparativos para o concerto de panxoliñas
Sen apenas tempo para descansar dos intensos momentos vividos, o Orfeón Valdeorrés xa traballa con ilusión no seu próximo compromiso: o tradicional concerto de panxoliñas. Esta cita musical terá lugar o 14 de decembro no Teatro Lauro Olmo, ás 20:00 horas, un evento que promete encher de espírito festivo a vila do Barco.
