Na mañá do 14 de xullo, 15 rapaces de idades comprendidas entre os 8 e os 16 anos, iniciaron o curso de piragüismo que impartirán os membros do Fluvial Barco os martes e xoves de 12:00 a 13:00 horas. Con este son catro os anos que A Rúa acolle este cursiño cada vez máis popular entre a xente miúda, habida conta que, segundo se comunica que está aberto o prazo de matrícula énchese de contado o cupo.
O 28 de agosto celebrarase na Rúa o campionato de piragüismo provincial Copa Deputación no que participan moitos de estes rapaces. O ano pasado o Fluvial concorreu a esta cita con sesenta e cinco padexeiros da comarca dos cales dez deles eran participantes deste cursiño.
A data do campionato retrásase respecto anterior ano, segundo nos dixo o monitor do curso e membro do Fluvial, para que os participantes dos cursos tanto do barco coma da Rúa podan participar nesta regata provincial.
