Chega a Valdeorras unha das citas máis esperadas polos amantes do viño e do turismo auténtico: a Primavera de Portas Abertas da Ruta do Viño de Valdeorras. Unha ocasión única para mergullarse no corazón dunha terra de tradicións milenarias, sabores inconfundibles e paisaxes que emocionan.
Durante os días 9, 10 e 11 de maio, Valdeorras converterase nun auténtico fervedoiro de experiencias. O programa propón actividades para todos os gustos, pero sen dúbida, as visitas guiadas ás covas tradicionais e ás adegas serán o prato forte. Un convite a descubrir, a través dos sentidos, a historia e o carácter dunha comarca onde o viño non é só un produto: é cultura, identidade e paixón compartida.
Entre as propostas máis suxestivas está "Entre Covas e Godellos de Valdeorras", unha ruta que levará aos participantes a adentrarse nas míticas covas soterradas —auténticos santuarios do viño valdeorrés— e a degustar os caldos en orixe, maridados con petiscos locais. Non só se visitarán as instalacións, senón que se paseará polos viñedos, escoitando de primeira man os segredos que agocha cada vide e cada leira.
Outra actividade que promete emocionar é a visita "Da viña á copa", onde se poderá comprender como o solo, o clima e o traballo das persoas moldean cada grolos de viño. Percorridos entre viñas, explicacións amenas e catas comentadas completan esta experiencia inmersiva.
Pero a Primavera de Portas Abertas é moito máis: catas dirixidas por sommeliers de renome, maridaxes de alta cociña, paseos guiados en segway entre viñedos, visitas ao Santuario das Ermidas, ao Castelo do Bolo ou ao Parque Natural Serra da Enciña da Lastra... Todo pensado para saborear Valdeorras con calma, con curiosidade e con pracer.
O evento arrincará o venres 9 de maio cun acto de inauguración no Hotel Monumento Pazo do Castro, con música en directo e cóctel de benvida. A partir de aí, será unha fin de semana intensa para quen queira descubrir unha Valdeorras auténtica, hospitalaria e chea de vida.
Esta iniciativa enmárcase dentro da campaña "Enoturismo Galicia, Primavera de Portas Abertas", unha aposta do Clúster Turismo de Galicia e das Rutas dos Viños das denominacións de orixe galegas para dar a coñecer a nosa riqueza vitivinícola de maneira próxima e vivencial.
Descubre Valdeorras: historia, natureza, viño e gastronomía
#PaseaOBarco
O Concello do Barco de Valdeorras organiza un percorrido pola beira do río Sil, dirixido pola responsable de Turismo da Oficina de Dinamización Turística, quen contará a historia do Barco, do Malecón, do Porto da Barca. Sábado 10 de maio, ás 17.00 h. Saída: Campo da Festa (O Barco de Valdeorras). Actividade gratuíta. Grupo máximo: 25 persoas.
Actividades no Concello do Bolo
- Visita Guiada ao Santuario de Santa María das Ermidas Visita guiada pola técnica de Turismo, Soledad Figueroa, a este santuario centenario, declarado BIC no ano 2006. Venres 9, sábado 10 e domingo 11 de maio, de 10.00 a 12.00 h. Actividade gratuíta.
- Visita Guiada ao Castelo do Bolo Visita guiada pola técnica de Turismo, Soledad Figueroa, ao castelo medieval e ao Museo de Yosso. Venres 9, sábado 10 e domingo 11 de maio, de 12.30 a 14.30 h (Museo só sábado, ás 12.30 h, con reserva previa). Prezos: 2 €/persoa; grupos +10 persoas: 0,50 €; xubilados: 1 €; veciños do municipio: gratis.
Parque Natural Serra Enciña da Lastra
Visita libre e gratuíta ao parque natural situado no concello de Rubiá, onde a aciñeira, sobreiras e castiñeiros se entrelazan nunha paisaxe única. Venres 9, sábado 10 e domingo 11 de maio, de 10.30 a 14.30 h e de 16.00 a 19.30 h. Actividade libre e gratuíta.
Actividades ofertadas polo establecemento Eco dos Teixos
- Teixadal de Casaio Ruta guiada interpretativa polo bosque ancestral do Teixadal de Casaio, con visita a fervenzas e antigos refuxios da guerrilla, rematando cun brinde na taberna de Eco dos Teixos. Sábado 10 de maio, de 09.00 a 16.00 h. 32 €/persoa. Grupo máximo: 8 persoas. Idade mínima: 16 anos. Máis información: 669 724 206 | www.ecodosteixos.com | ecodosteixos@gmail.com.
- A Cidade dos Alemáns Visita ás minas de volframio explotadas durante a Segunda Guerra Mundial, rematando cun brinde na taberna de Eco dos Teixos. Domingo 11 de maio, de 10.00 a 14.30 h. 22 €/persoa. Grupo máximo: 15 persoas. Idade mínima: 16 anos. Máis información: 669 724 206 | www.ecodosteixos.com | ecodosteixos@gmail.com.
Ruta guiada en Segway entre sendeiros e viñedos de Valdeorras
A empresa Enoturismo Galicia organiza unha excursión en segway entre viñedos e bosques no Aguillón da Rúa, acompañados dun guía experto. Sábado 10 de maio, entre as 10.00 e as 18.00 h (duración aproximada: 1 hora). 25 €/persoa. Grupo mínimo: 8 persoas (en grupos de 4 máis guía). Máis información: 676 101 649 | www.enoturismogalicia.es | info@enoturismogalicia.es.
Entre covas e Godellos de Valdeorras
A Ruta do Viño organiza unha visita guiada a tres covas tradicionais da comarca, cun percorrido polas adegas Joaquín Rebolledo, A Coroa e Melillas e Fillos, con degustacións e almorzo galego. Domingo 11 de maio, de 10.15 a 16.00 h. Saída: Parque de San Roque (A Rúa). 30 €/persoa. Máis información: 604 078 753 | www.rutadelvinovaldeorras.com | info@rutadelvinovaldeorras.com.
Showcooking “Degusta Valdeorras”
Obradoiro de cociña galega con toques vangardistas, maridado con viños de Valdeorras, a cargo dun cociñeiro de "Cociña Ourense" e Jorge Mazaira, director técnico do Consello Regulador. Sábado 10 de maio, de 13.00 a 14.30 h. Complexo Hostaleiro Paladium. 25 €/persoa. Grupo mínimo: 15 participantes, máximo: 25. Máis información: 604 078 753 | www.rutadelvinovaldeorras.com | info@rutadelvinovaldeorras.com.
