O director da Axencia de Turismo de Galicia, Xosé Merelles, visitou este venres na Pobra de Trives o establecemento La Viuda, un dos negocios beneficiarios da liña de axudas da Xunta destinada á modernización de aloxamentos e establecementos de restauración.
Durante a visita, Merelles destacou que a convocatoria deste ano está dotada con 4,5 millóns de euros, dos que 3,5 millóns se destinan á modernización de establecementos de aloxamento e un millón de euros a negocios de restauración.
En total, a Xunta concedeu axudas a 212 proxectos en toda Galicia: 144 correspondentes a aloxamentos turísticos e 68 a establecementos de restauración.
No caso de La Viuda, as subvencións permitiron renovar a fachada e mellorar a imaxe exterior dun establecemento considerado un referente tanto na Pobra de Trives como na súa contorna.
O director da Axencia de Turismo lembrou que este tipo de convocatorias forman parte da aposta da Xunta por reforzar a competitividade do sector turístico galego. Segundo explicou, nos últimos tres anos Turismo de Galicia destinou 18 millóns de euros a diferentes liñas de apoio para modernizar e actualizar establecementos turísticos.
«Queremos facer de Galicia un destino cada vez máis atractivo, cunha oferta de maior calidade e adaptada ás necesidades actuais dos visitantes», sinalou Merelles durante a súa visita.
Presenza en Sons Urbanos
Xa pola tarde, o director da Axencia de Turismo desprazouse ata A Rúa para participar na estrea de Sons Urbanos que reunirá na Praza da Estación a 4 artistas entre eles a ruesa Mela.
O concerto está incluído dentro dos Concertos do Xacobeo e ademáis da arista local subiranse ao escenario 9Louro, Kid Mount, Kike Varela y Mela, ofrecendo á comarca una noite de sons urbanos e novas tendencias musicais.
Turismo de Galicia pon este sábado o foco en Valdeorras
O director da Axencia de Turismo, Xosé Merelles, visitará a comarca para participar en tres iniciativas que poñen en valor o patrimonio, o enoturismo e a programación cultural do verán.
A primeira parada será ás 13:30 horas na estación da Rúa-Petín, onde recibirá aos participantes da ruta de Valdeorras dos Trens Turísticos de Galicia, unha proposta que permite descubrir os principais atractivos da comarca combinando a viaxe en ferrocarril coa gastronomía, a cultura e o viño.
A continuación, a comitiva desprazarase ata Adega A Coroa, onde os visitantes coñecerán de preto un dos proxectos vitivinícolas de referencia da Denominación de Orixe Valdeorras e a tradición vinícola do territorio.
Xa pola tarde, Xosé Merelles participará en Vitis Lumen Larouco, acompañado polo director da Axencia Galega da Calidade Alimentaria, Martín Alemparte. O evento, que se celebra no barrio de Seoane, combina patrimonio, viño, gastronomía e recreación histórica nun percorrido polas antigas adegas da localidade.
A xornada rematará na Praza da Estación da Rúa, onde o director de Turismo asistirá ao festival O Son da Estación, incluído na programación dos Concertos do Xacobeo, unha cita que reunirá sobre o escenario a Baiuca, Nadadora, Luis Fercán, Navegando a Barlovento ou Kilvir DJ.
Con esta visita, Turismo de Galicia amosa o seu respaldo a iniciativas que representan diferentes formas de descubrir Valdeorras: a través do turismo ferroviario, do enoturismo e da cultura, reforzando a imaxe da comarca como un destino cada vez máis atractivo durante o verán.
