Quince persoas participaron no último curso de cata da Ruta do Viño de Valdeorras

Un total de 15 persoas participou no último curso de cata organizado pola Ruta do Viño de Valdeorras a pasada fin de semana do 22 e 23 de xuño. O Hotel A Calzada, de Vilamartín, acolleu o curso impartido por Jorge Mazaira, director técnico do Consello Regulador.

Nel amosáronse as características dos viños envellecidos e ademais puideron catar máis de 20 referencias dos viños das adegas adheridas á Ruta. Os asistentes descubriron a potencialidade do envellecemento dos viños da comarca. 

As adegas presentes na cata foron: Quinta da Peza, Joaquín Rebolledo, D´Berna, Pago de los Capellanes, Sampayolo, Bioca, Adega da Pinguela, Quinta da Peza, Terriña, O Cepado, Virgen del Galir, Santa Marta, Godeval, A Coroa, Roandi, O Casal, Alán de Val e Melillas.

Por outra banda, os asistentes realizaron unha ruta polo Parque Natural Serra da Enciña da Lastra acompañados do guía do parque. O evento rematou cunha cata e unha comida na Pontevella (Sobradelo).