O deputado do BNG no Congreso, Néstor Rego, vén de rexistrar iniciativas na cámara baixa despois do colapso da presa de Santiago —Valencia do Sil— e reclama sancións á empresa polo rebentón da comporta central. A organización nacionalista denuncia as deficiencias técnicas e danos estruturais causadas pola falta de mantemento e a neglixencia por parte da empresa concesionaria.
«A pesar das boas noticias, entendemos que é preceptivo que, máis aló da investigación interna que de oficio leve a propias empresa, as institucións públicas con competencias realicen tamén unha investigación independente para analizar se se estaban levando a cabo de maneira correcta os labores pertinentes de mantemento» explica o deputado nacionalista. Rego demanda medidas de control por parte da Confederación Hidrográfica Miño-Sil para comprobar o estado e mantemento das instalacións hidroeléctricas.
Así mesmo, a organización nacionalista quere coñecer se se levantou algunha acta sobre deficiencias técnicas ou danos estruturais que deban corrixirse nesta ou noutras presas situadas na conca Miño-Sil e demandan unha copia da mesma. «Resulta evidente que se produciu un feito grave e por tanto as medidas preventivas e de control en vigor manifestáronse claramente insuficientes e por tanto han de ser modificadas» denuncia o deputado nacionalista.
«Iberdrola acaba de anunciar un récord histórico de ganancias para a empresa en 2021 de 3.885 millóns de euros de beneficio neto - 8% máis que o ano pasado- que supera un dato histórico para a empresa» lembra Rego. «Ao mesmo tempo que presentan estes datos a empresa acaba de fechar o Centro de Operacións de Control (COC) que estaba situado na Rúa rompendo cunha boa parte do xa de seu escaso retorno en postos de traballo cualificados e valor engadido que a empresa daba á comarca a cambio de facerse cos seus recursos naturais».
En opinión da formación nacionalista, que traslada ao Goberno do Estado, a xestión debería ser «máis próxima, máis eficaz e eficiente para o control adecuado desta e outras presas da conca, para o que sería necesario que a xestión da mesma realizásese desde Galiza».
Por último, o deputado do BNG quere coñecer se se detectaron con anterioridade problemas que fixesen pensar na posibilidade de que tivese lugar un feito como este. Demanda as medidas preventivas que tiña a empresa «tendo en conta que non é obrigatorio que conten cun plan de emerxencias e que impacto tivo este feito sobre o río Sil e sobre a fauna que nel habita e aniña».
