Como diría a miña mai: «Os vellos cada vez van a menos e os mozos teñen que traballar». Tampouco axuda moito que o Santo dos animais «caia» en día de semana nin que as crenzas relixiosas estean en declive.
Era un santo ben festexado cando era nena. Había festa rachada e a igrexa estaba chea de bote en bote. Na mesa non faltaba o cocido, precedido por un entremés que incluía o estómago do porco recheo de carne, ovo, xamón... Na sobremesa, a ucheira era o doce obrigado. Pola tardiña, o baile cobraba vida no Central, no Teleclub ou onde cadrase, sempre a cuberto, porque daquela as tardes eran para saír abrigados ou con paraugas. Algúns anos, ata caía neve.
Si, estou a falar de hai máis de cincuenta anos, cando as festas vivíanse doutro xeito. Tal día como hoxe, collíase auga bendita e bendicíanse aos animais: os cochos que quedaban na cuadra, os burros, as vacas... e tamén os cans, que daquela gardaban a casa, as ovellas ou ían á caza. Entraban e saían ao seu antoxo, sen que fixera falta acompañalos a mexar.
O San Antonio era tamén a festa dos quintos. Os mozos que ían ese ano á mili organizaban a festa. Pedían polas casas, pagaban a orquestra e o que sobraba repartíase, levando algún cuartiño para gastar ao chegar ao lugar onde «tocaba».
Hoxe, apenas catro ducias de persoas, xa de certa idade, acompañaron ao Santo na procesión que foi da igrexa á praza e de volta. Iso si, este ano houbo novidade: a presenza do novo párroco, Daniel Pérez, que substitúe ao finado Lisardo Paradelo.
Os que non faltan neste día tan sinalado son os do coro. Coas súas voces acompañan toda a homilía, poñendo, xunto ao grupo de gaiteiros, a nota musical da xornada.
Ruta de pinchos e actuación da Sonora
Petín é un pobo festeiro e, por iso, mañá 18 de xaneiro haberá unha ruta de pinchos. Os catro bares do lugar teñen preparado un petisco especial para acompañar a bebida. Así, a partir das oito da tarde, cada establecemento ofrecerá a súa especialidade: O Pitón servirá fabada; un cunco de zorza será a proposta do Coxita; no Cuatro poderase degustar paella e no Doble, unha cunca de caldo.
Ademais, Viva Petín, en colaboración co concello, ofrecerá panceta asada e chourizos na praza. A festa continuará coa actuación da Sonora Petinesa, que renderá unha homenaxe a Rafa, recentemente falecido.
Petín celebra o San Antonio, pero doutro xeito: menos xente na igrexa e máis na praza.
