Petín prepárase para unha noite chea de emocións, música e moita complicidade. A Sonora Petinesa, o grupo de amigos que conquistou ao público coas súas actuacións en playback, regresa tras dous anos de silencio para renderlle unha sentida homenaxe a un dos seus integrantes máis queridos: Rafael Sixto.
A cita será o 18 de xaneiro, dentro da Festa de San Antón, cun percorrido de tapas e pinchos pola praza e os bares do pobo. Unha noite que promete moita festa, lembranzas e, sobre todo, moito espectáculo.
Un regreso con historia
Amancio, un dos fundadores do grupo, lembra como comezou esta divertida aventura no 2012: «A idea xurdiu de repente porque non había cartos para a orquestra, así que decidimos montar o noso propio show». Durante catro anos, fixeron rir e bailar a todo Petín, ata que decidiron facer unha pausa. Pero agora volven con máis ganas ca nunca. «Pensamos que era o momento perfecto para volver e renderlle unha homenaxe a Rafa, que foi un dos motores do grupo».
Ensaios, anécdotas e moitas risas
Se hai algo que caracteriza á Sonora Petinesa, ademais do seu bo humor, son as súas anécdotas. Como lembra Martina: «No meu primeiro ano, paroume a Garda Civil para facer un control e eu disfrazada de Mickey Mouse. E mentres, Amancio chamándome porque chegaba tarde!»
Vicente, outro dos membros do grupo, tamén se suma a este momento de risas: «Aquí estamos tres exalcaldes, e sempre se di que os políticos somos un pouco pallasos. Pero a sorte é que podemos ofrecer este espectáculo de maneira espontánea. Síntome un privilexiado de formar parte desta banda»
O que está claro é que a Sonora Petinesa non perde a súa esencia: diversión, amizade e moito ritmo. Como di Vicente: «O noso reto sempre foi claro: cada vez que volvan os Rolling Stones, volve a Sonora Petinesa».
