A cor dos debuxos de Kukas, protagonista na exposición do Barco

Dende hoxe xoves 12 de setembro, cando poñemos un pé na sala de exposicións de ABANCA do Barco, inúndanos unha sensación especial: de troula, de cultura, de cor e, sobre todo, de arte. 

Kukas —Marcelino de Santiago Viqueira— é o artista que deseñou o cartaz das Festas do Cristo deste ano, e tamén o creador de todas as obras que se expoñen agora neste espazo do municipio barquense. «Esta é unha mostra moi reducida dos meus traballos, pero quixen expresar o meu cariño por esta vila e, sobre todo, a festa», explicaba o artista na inauguración. 

Pola súa banda, a concelleira de Cultura, Margarida Pizcueta, quixo destacar «o noso agradecemento de que Kukas, que vén dende Santiago, aceptase esta petición para amosar unha pequena parte da súa obra, que é moi especial».

A exposición estará aberta até o día 30 deste mes. Lembrar ademais que Kukas estará no Barco, de novo, o vindeiro luns 16 co seu espectáculo de monicreques "Un, dous tres, catro estacións. Viva Vivaldi".