Baixo a mirada inmortal de Curros Enríquez, capturada polo pincel inconfundible da valdeorresa Lola Doporto, a revista Nós a Xente do Redor presentou o seu número 16. O acto, celebrado nas instalacións da Asociación Cultural Albor en Ourense, converteuse nunha festa da arte e da cultura galega, congregando a autoridades, creadores e amantes do patrimonio cultural.
Entre os asistentes destacaron Gonzalo Pérez Jácome, alcalde de Ourense; Juan Manuel Casares Gándara, parlamentario da Xunta de Galicia; Manuel Pardo, delegado territorial; Rosendo Fernández, presidente do Inorde; Carmen Leyte e Rosa María Sánchez Gándara, senadoras por Ourense, ademais do imprescindible Manuel Blanco Villar, fundador de A Casa do Patrón, Ecomuseo do Mundo Rural Galego, quen acudiu como autor e defensor deste proxecto.
O evento foi unha homenaxe á arte e aos artistas, dando voz a nomes como Paco Ascón, Anxo do Souto, Miguel Ángel Martínez Coello ou Adela Figueroa. A revista reafirma así o seu compromiso coa difusión da cultura galega e co recoñecemento de creadores locais e universais con raíces nesta terra.
Nun ambiente de celebración, as Pandereteiras e o Grupo Musical da Asociación Loureiro puxeron a nota festiva, acompañadas polo acordeonista Maxi e Benito Villar. Así, Nós a Xente do Redor segue consolidándose como unha plataforma esencial para conectar tradición, creación e identidade cultural.
