Gargallada Teatro volta ao Barco coa súa obra “Desastre de función”

A compañía barquense Gargallada Teatro volta ás súas raíces para interpretar por derradeira vez a obra “Desastre de función”. Terá lugar este venres, 24 de febrero, ás 21:00 horas no Teatro Lauro Olmo do Barco.

“Moita xente parábanos pola rúa pedindo que volveramos facer a obra”, admite o actor desta compañía, Manuel González. E é que Gargallada Teatro vén de acadar premios en todos os festivais nos que participou, sete para ser exactos, sendo algúns os máis importantes de España.

“Sabiamos que a obra estaba ben, que era diferente, intelixente, moi divertida…”, recoñece González. E non é para menos, xa que no Festival de Teatro Amateur de Alegría (Vitoria), levaron catro premios: xurado, escenografía, actores e actrices. Tamén acadaron galardóns no Valdemorillo (Madrid) ou no FESTEAF de Rivas- Viciamadrid, o cal é un dos máis desexados. “Presentáronse 169 obras de toda España e só seleccionan a seis, nós gañamos o premio do xurado e o de escenografía”, afirma o actor barquense.

Así, a última actuación desta compañía foi no Festival Viaje al Parnaso de Argamasilla de Alba (Ciudad Real), no que acadaron os premios do xurado, do público e a mellor actor. Porén, agora toca volver ás raíces, xa que o 24 de marzo actuarán no Teatro Principal de Ourense. “Soa a chiste pero é a primeira vez que imos actuar na capital; tiñamos ganas porque xa estivemos en Santiago, ou en outros teatros de renome, e faltaba este”, recoñece Manuel González.

Hai que recordar que esta é unha compañía afeccionada, polo que os seus integrantes non viven do teatro. “Vaste liando e vas preparando cousas. Ves que as cousas funcionas e o que levaba 5 minutos ao final vai en 5 horas”, explica González.

Ademais, as viaxes aos diferentes festivais son longas,  e a última foi de 1200km ida e volta nun  fin de semana. Porén, o actor barquense afirma que “nós pasámolo moi ben e se ves que a xente que tes no patio de butacas o pasa bomba, se divirte e aplaude cunhas ganas que meten medo para que queres máis”.

Así, dende Gargallada Teatro animan a que “vaian todas e todas porque é a última vez que a poidamos facer aquí e estamos pendentes de que nos convoquen en outros festivais”. “É un orgullo levar o nome do Barco por aí adiante”, admite.