domingo. 19.05.2024
somoscomarca_arua_avenida_florencionaterra_domimgodiaz_deboraalvarez_2022 (2)
"Florencio na Terra", o punto e a parte do ano de Florencio Delgado Gurriarán

Punto e final ao ano das Letras de Florencio. Este domingo, 18 de decembro, celebrábase o último acto presencial do ano do poeta de Córgomo. O Centro Cultural Avenida da Rúa acollía a preestrea do documental "Florencio na Terra" producida por SocialDocs e dirixida polo petinés Domingo D. Docampo.

A película, gravada en Valdeorras e México, conta ademais con secuencias de animación que recrean episodios da vida de Florencio. Trátase dun achegamento persoal e creativo á figura do poeta. A produción realizouse durante un ano e ofrécenos un relato diferente sobre o autor de Córgomo, con testemuños de persoas que viaxaron con el na viaxe en barco desde París ata México.  

somoscomarca_arua_avenida_florencionaterra_domimgodiaz_deboraalvarez_2022 (1)

«Florencio é un símbolo, un representante de moitas máis vidas», asegura o director desta produción, Domingo D. Docampo, na presentación. «Non me apetecía ter a expertos analizando a obra de Florencio e decidímonos a crear secuencias de animación e montar unhas obras de teatro en Córgomo». 

A súa estrea oficial será durante o 2023, e como se adiantaba no acto da Rúa, realizarase de forma simultánea en Madrid e Ciudad de México. A versión definitiva incluirá tamén recreacións con veciños de Córgomo, así como a voz do propio Florencio nunha entrevista que concedeu a Dores Plá.

somoscomarca_arua_avenida_florencionaterra_domimgodiaz_deboraalvarez_2022 (4)
Domíngo D´. Docampo nun momento da súa intervención

Con este último acto ponse un punto e a parte ao ano de Florencio. Finalizan as letras do valdeorrés, pero non é o final do camiño, senón o inicio dun novo que arrinca en 2023 coa Fundación Florencio Delgado Gurriarán. 

somoscomarca_arua_avenida_florencionaterra_domimgodiaz_deboraalvarez_2022 (5)
A nai e o pai de Domingo na pre-estrea

 

"Florencio na Terra", o punto e a parte do ano de Florencio Delgado Gurriarán