A Deputación de Ourense, a través do Instituto Ourensán de Desenvolvemento Económico (Inorde), levou a cabo unha acción de promoción turística en A Coruña para dar a coñecer o Xeodestino Trevinca-Valdeorras. Esta iniciativa enmárcase no convenio asinado coa Axencia Galega de Turismo, co obxectivo de divulgar os atractivos da provincia e fomentar o turismo ao longo de todo o ano, apostando pola desestacionalización.
No mercado gastronómico O' Culto, realizáronse catro catas gratuítas de viño da Denominación de Orixe Valdeorras, dirixidas pola experta Cristina Murga. Cada sesión contou con quince asistentes, que puideron degustar viños maridados con produtos autóctonos da zona. Ademais, os participantes nas catas entraron nun sorteo dunha experiencia no xeodestino, valorada en 250 euros.
Como acción complementaria, repartíronse folletos promocionais que inclúen un código QR. Este permite cubrir un formulario para participar no sorteo dunha estancia en Valdeorras, incentivando así o interese polo destino entre os asistentes ao mercado coruñés.
A iniciativa reflicte o compromiso da Deputación de Ourense por promover o turismo interno en mercados de proximidade como A Coruña. O obxectivo é xerar coñecemento sobre a riqueza natural e cultural de Valdeorras, así como potenciar o enoturismo, que ofrece experiencias únicas durante todo o ano.
