A Deputación de Ourense continúa a desenvolver o Programa de colaboración cos concellos de menos de 20.000 habitantes para a elaboración do censo de instalacións e emprazamentos con amianto, unha iniciativa fundamental para dar cumprimento á Lei 7/2022 de residuos e solos contaminados para unha economía circular.
O programa, aprobado definitivamente polo Pleno da institución provincial o 20 de decembro de 2024, conta actualmente con 87 concellos adheridos e execútase no período 2025–2027, ofrecendo asistencia técnica e económica aos municipios a través da concesionaria provincial AquaOurense, Sociedade Provincial de Augas e Medio Ambiente, S.A.
Os traballos iniciáronse no mes de xuño e presentan xa un grao de avance significativo. Ata o momento, 35 concellos completaron a fase inicial, que inclúe a elaboración do censo preliminar e a teledetección de cubertas de fibrocemento. Esta primeira análise permitiu abranguer arredor de 49.000 edificacións e identificar unhas 16.500 cubertas susceptibles de conter amianto.
Na fase intermedia, centrada no traballo de campo e no cribado do censo, atópanse 26 concellos, nos que se realizaron preto de 700 preinspeccións visuais en edificacións de titularidade pública municipal. Ademais, 18 concellos avanzan xa na fase final, que contempla a elaboración da documentación definitiva do censo e a proposta dun calendario e planificación para a retirada progresiva do amianto.
Visor web con mapa interactivo
O programa complétase co desenvolvemento dun visor web específico, denominado LocAm, creado en colaboración coa empresa Soluciones Gis Galicia, S.L. Esta ferramenta permitirá a cada concello dispoñer dun mapa interactivo no que se visualizan todas as edificacións clasificadas segundo o seu nivel de risco por amianto, facilitando así a avaliación técnica e a toma de decisións de cara ás actuacións futuras.
Desde a Área de Medio Ambiente da Deputación de Ourense destacan que este programa supón un apoio decisivo para os concellos, especialmente para os de menor tamaño, xa que lles permite cumprir coa normativa vixente, reforzar a protección da saúde pública e avanzar cara a unha xestión máis segura e ordenada das infraestruturas municipais.
