O subdelegado do Goberno en Ourense, Eladio Santos, presidiu este mércores unha reunión de coordinación cos organismos e representantes dos concellos da provincia implicados no dispositivo especial previsto con motivo da eclipse solar total que terá lugar o vindeiro 12 de agosto.
Durante o encontro analizouse a situación actual dos puntos de observación habilitados na provincia. Polo momento están previstos seis espazos distribuídos en cinco municipios, aínda que varios concellos solicitaron a incorporación doutros dous puntos, polo que a rede podería ampliarse nos próximos días.
Segundo explicou o subdelegado, o obxectivo desta coordinación é garantir que a xornada se desenvolva con normalidade e ofrecer as mellores condicións tanto á cidadanía como aos visitantes que elixan a provincia de Ourense para contemplar este fenómeno astronómico.
Na reunión participaron a alcaldesa de Larouco, Patricia Lamela; a alcaldesa da Rúa, María González Albert; o alcalde da Veiga, Juan Anta; o alcalde de Manzaneda, Pedro Yáñez, así como a técnica de Turismo do Concello do Barco de Valdeorras.
