Carina en MARCO Petín
Carina y unas amigas rodeada de sus obras en Marco Petín
A artista valdeorresa Carina Rodríguez exporá as súas obras no Liceo de Ourense do 17 ao 31 deste mes de marzo. Esta muller dedica o tempo que lle queda libre a pintar e comezou a expoñer as súas obras hai relativamente pouco, aínda que leva dende os quince anos pintando.
Esta pintora comezou de maneira autodidacta ata os 35 anos. «O meu marido empurroume a acudir ao estudo do gran pintor Manuel Romero e foi unha persoa que me deu moitas ás, traballou en museos en Londres e dicíame que tiña que seguir apostando pola miña maneira de pintar», explica.
A súa primeira exposición foi en Cambre, cando vivía na Coruña. Porén cando comezou a súa andadura de vida en Valdeorras, «varios locais apostaron pola miña obra, é unha maneira de introducirse na dinámica das exposicións, de perder o medo».
Así, a súa primeira gran exposición foi en Marco Petín. Carina Rodríguez recoñece que «o que a min me daba un pouco de medo, era que a xente non sabía que eu pintaba, e teño máis de 200 obras entre acuarelas, acrílicos..».
Anos atrás, recoñece que só tiña tempo para pintar e non para facer exposicións, pero agora «xa teño que empezar a expoñelos e a que se vexa o meu traballo». «O triunfo xa está, que é que o vou facer», afirma.
No só pinta ao óleo senon que tamén o fai con ceras, acuarela...
A pintura como válvula de escape
Carina Rodríguez utiliza a pintura como válvula de escape. «Cando pinto saco ganas de seguir co día a día», afirma, «gustaríame nalgún momento ter dúas mañás libres á semana para plantexarme unha obra máis sosegada, para ver que sae».
Así, esa característica explosión de cor nas súas obras comeza cun lenzo en branco. «Para min é unha comunicación co cadro e vou facendo o que me pide», explica.
En canto a inspiración, a súa vai dende un xesto dunha persoa, un baile tradicional, a pintura rupestre, o entroido de Viana e de Galicia en xeral ata o cambio cromático das estacións en Valdeorras. «Ás veces si que pinto cousas realistas, pero a maioría das veces é unha cor, un trazo, que é o que me recorda ese momento», explica, «ten que ser algo que me impacte».
Deseño e confección de roupa
Carina Rodríguez é unha artista 360º. De feito, tamén confecciona roupa a partires das súas obras. «O que máis me motiva para o tema da roupa é poder levar toda a cor que aparece nun lenzo», recoñece.
O proceso de creación anteriormente consistía na compra de metros de tela, «colocábaos nun bastidor, pintaba a tela, e aprendín corte e confección». Porén, na actualidade consiste na impresión das obras en teas no que o resultado é «totalmente distinto».
Non deixes de ver a conversa que mantivemos con Carina no espazo onde crea as súas obras:
