Ás 20:00 horas desta tarde do xoves, 17 de febreiro, presentábase no Edificio Multiusos do Concello do Barco a reedición dos libros Bebedeira, Galicia Infinda e O soño do guieiro de Florencio Delgado Gurriarán.
O acto estivo presidido polo alcalde do concello, Alfredo García, a coordinadora do proxecto As Letras de Florencio, Débora Álvarez, e dous familiares do autor, Ricardo Gurriarán e Elva Delgado. Francisco Castro, director da Editorial Galaxia, non puido asistir á presentación.
Elva Delgado foi a encargada de dar inicio á presentación lendo o discurso que Florencio Delgado Gurriarán deu como pregoeiro das Festas do Cristo do Barco no ano 1981. Alfredo García encargouse de presentar a cada un dos intervintes.
Con todo, Débora Álvarez realizou un pequeno percorrido polas tres obras do autor nado en Córgomo. «No libro Bebedeira recóllense as súas primeiras poesías, nas que se pode atopar de forma máis clara a paisaxe valdeorresa. Non deixa fóra o viño nin as montañas, é unha entrada á obra de Florencio por todo o grande», destacaba a coordinadora.
Pola súa banda, Ricardo Gurriarán, comentaba aos asistentes algunhas características persoais do autor e lembraba que estivo, soamente, 13 anos vivindo na comarca polo exilio. Definíao como «unha persoa excesivamente sensible, un home de creación circunstancial, de corazón amplo e de impulso».
