somoscomarca_202
A celebración da Florenciada en Córgomo, con motivo das Letras Galegas, foi un acto cheo de sentimento e historia que marcou un momento especial. A inauguración correu a cargo de Enrique Álvarez, alcalde de Vilamartín, quen ás 12:00 da mañá abriu oficialmente o evento cunha intervención que puxo en valor a importancia de manter vivas as tradicións e a memoria de figuras como Florencio, un personaxe emblemático do pobo.
Durante estes dous últimos anos, a idea de recuperar a feira e a súa esencia foi unha ilusión que a Fundación Florencio, agora xa consolidada, decidiu facer realidade. Aínda que a pandemia puxo obstáculos, a vontade de volver a celebrar a Florenciada foi maior, e por fin, este ano, a iniciativa foi retomada con forza e entusiasmo. Pero, ¿de onde vén o nome de Florenciada? A celebración quixo ser un recoñecemento ao legado de Florencio no ano das súas Letras, un home que, na súa época, era coñecido por reunir amigos, tanto amigos como non tanto, en momentos de convivencia e festa.
Florencio tiña unha particular paixón por visitar as covas e as bodegas de Córgomo, lugares que, aínda hoxe, conservan a súa historia e encanto. As covas, con ata cuarenta ou máis peldaños, eran escenario de reunións e momentos de amizade, aínda que tamén de algunha que outra anécdota divertida, como as que recordan as mulleres do pobo, que se queixaban de que Florencio e os seus amigos tardaban en subir, debido á dificultade do acceso.
Para a comunidade de Córgomo, recordar a Florencio é fundamental, pois representa a esencia do pobo, a súa historia e o seu carácter. Por iso, a decisión de retomar a Florenciada é un acto de homenaxe e de reafirmación da identidade local. Córgomo, hoxe en día, é o pobo de Valdeorras que máis sona, non só por ser a cuna do mellor viño e do famoso godello, senón tamén pola súa cultura, que comeza a ter un recoñecemento maior cando Florencio afirmou que a cultura é de Valdeorras.
Pero a celebración non se limita á historia e á tradición. A cultura, o deporte e a gastronomía unen forzas para crear un espírito de unión invencible. Durante a mañá, o presentador Guti González, desde a Casa do Pobo, animou a todos a participar no "Dicionario Valdeorrés", unha actividade na que os asistentes podían escribir palabras propias da zona, reforzando así o sentimento de pertenza e identidade.
A programación do día foi intensa e variada. Ás 10:00 da mañá, comezou a camiñada de 5 km desde Arcos ata Córgomo, con 40 participantes acompañados por figuras como Calor López, José María Bustillo e Lucio Santalla. Ás 11:00 horas, a praza acolleu unha feira de artesanía con participación de diversos artesáns locais, como Cumbres de Trevinca, Terras Guigurras, Barbudos, O Marquesado, A Tenda de Rita, Pulpeira Matilde, entre outros, acompañados pola música en vivo de Os Charangaiteiros.
Ás 14:00 horas, con participación de 140 comensais, comezou o xantar popular na Casa da Cruz. O espazo estaba completamente acondicionado para o evento, deseñado nun plano amplo, pero tamén con pequenas esquinas que invitaban ao recollimento e á diversión en privado. Este lugar seguramente ofrecerá moitas máis ledicias aos habitantes de Córgomo e a todos os que desexen achegarse a visitalo.
Ás 15:00 horas, tivo lugar a actuación do grupo Pandega; ás 17:00, realizouse unha foliada con Abertal; e ás 19:00, pechouse a xornada con cantarenas xunto ás Parrandas.
