Córgomo (Vilamartín) converteuse este xoves no punto de partida dunha nova proposta para redescubrir o territorio: as “Rutas que rexeneran”, unha iniciativa impulsada pola Deputación de Ourense a través do Inorde dentro do Xeodestino Trevinca-Valdeorras.
A primeira das citas levou a preto de 30 persoas a percorrer unha ruta circular de arredor de tres quilómetros con saída desde a praza de Córgomo, nun itinerario que puxo o foco na riqueza histórica e arqueolóxica da contorna.
Guiados polo arqueólogo Santiago Ferrer, os participantes iniciaron o percorrido pasando pola casa natal de Florencio Delgado Gurriarán e pola igrexa de Santa Marta, onde fixeron unha parada para coñecer os seus retablos e a súa historia.
A ruta continuou cara á antiga explotación aurífera das Barreiras, un dos puntos máis destacados do itinerario. Tal e como explicou Ferrer, trátase dun espazo onde o ouro se extraía mediante a técnica da ruina montium, un sistema empregado polos romanos que utilizaba a forza da auga, canalizada dende os ríos Farelos e Leira, para derrubar a montaña e acceder ao mineral.
O percorrido seguiu en dirección a Arcos, onde o grupo puido coñecer a coñecida como “Cova dos Mouros”, outra explotación mineira, neste caso de ouro de orixe primaria, que chamou especialmente a atención dos asistentes.
P
A última parte da ruta levou aos participantes ata diferentes zonas con petroglifos, entre os que destaca o coñecido como “labirinto”, un dos conxuntos máis completos da zona. Segundo explicou o arqueólogo, algúns destes gravados poderían estar relacionados con sistemas simbólicos ou solares, aínda que a súa interpretación segue aberta, xa que este tipo de representacións aparecen en distintos puntos do mundo.
Esta actividade marca o inicio dun calendario que se desenvolverá ata o mes de maio en distintos concellos do xeodestino, combinando rutas históricas, natureza, gastronomía e experiencias sostibles.
Tras esta primeira parada en Córgomo, a programación continuará este sábado cun novo percorrido polos concellos de Petín e A Rúa, centrado tamén no patrimonio histórico da zona
