viernes. 29.03.2024

A directora xeral de Patrimonio Natural visita o colexio Virxe do Camiño de Rubiá

A directora xeral de Patrimonio Natural, Belén do Campo, estivo acompañada do delegado territorial da Xunta en Ourense, Gabriel Alén, e do alcalde da localidade, Elías Rodríguez, e fixo fincapé na necesidade de coidar, valorar e protexer as distintas especies da flora e fauna que habitan no noso territorio
somoscomarca_rubia_visitaalen_virxedocamiño_mediorural_20232023821 (3)
somoscomarca_rubia_visitaalen_virxedocamiño_mediorural_20232023821 (3)

A directora xeral de Patrimonio Natural, Belén do Campo, visitou hoxe o CEIP Virxe do Camiño, en Rubiá, por mor do Día internacional da biodiversidade, onde incidiu na importancia de concienciar ao alumnado da importancia de preservar a flora endémica ameazada da Comunidade.

Durante o encontro cos estudantes, na que estivo acompañada do delegado territorial da Xunta en Ourense, Gabriel Alén, e do alcalde da localidade, Elías Rodríguez, a directora xeral fixo fincapé na necesidade de «coidar, valorar e protexer as distintas especies da flora e fauna que habitan no noso territorio».

somoscomarca_rubia_visitaalen_virxedocamiño_mediorural_20232023821 (1)
Andrea Tato, Elías Rodríguez, Gabriel Alén e Belén do Campo

Así, para seguir avanzando cara a unha maior concienciación da sociedade sobre a importancia de garantir a preservación da nosa biodiversidade, a Xunta editou unha colección de materiais, que, baixo o título Flora endémica ameazada de Galicia, pretende divulgar a gran beleza destas especies, que se caracterizan por presentar un rango xeográfico reducido e só crecen en determinados tipos de hábitats.

Segundo explicou a directora xeral, para a elaboración deste material divulgativo realizouse unha selección que conforma unha pequena mostra das especies ameazadas ou vulnerables que se poden encontrar no noso territorio. No caso concreto do Parque da Serra da Enciña da Lastra, incluíuse a Petrocoptis grandiflora. Trátase dunha herbácea perenne con tallos ramificados de ata 30 centímetros, pétalos distribuídos de forma asimétrica e irregular e cáliz de cor púrpura.

somoscomarca_rubia_visitaalen_virxedocamiño_mediorural_20232023821 (2)
Belén do Campo e Gabriel Alén no miradoiro de Penarrubia no Parque Natural Serra da Enciña da Lastra

A través desta colección a Xunta busca divulgar os valores do patrimonio natural de Galicia e contribuír á promoción da defensa da natureza e dos elementos que a compoñen, “dúas liñas de traballo fundamentais na conservación da nosa biodiversidade”, aseverou Do Campo.

A maiores, logo de salientar que a diversidade biolóxica é un ben de gran valor para as xeracións presentes e futuras, Do Campo incidiu no traballo que se está a desenvolver no Parque Natural da Serra da Enciña da Lastra, que é o espazo protexido que sustenta a mellor representación da vexetación mediterránea de toda Galicia.

somoscomarca_rubia_visitaalen_virxedocamiño_mediorural_20232023821 (4)

 

A directora xeral de Patrimonio Natural visita o colexio Virxe do Camiño de Rubiá