O subdelegado do Goberno en Ourense, Eladio Santos, destacou esta mañá o papel esencial da Garda Civil na prevención de riscos no medio natural durante a exhibición realizada polo GREIM (Grupo de Rescate e Intervención en Montaña) e o SEPRONA (Servizo de Protección da Natureza) ante os nenos e nenas participantes no IV Campamento de Espeleoloxía Infantil Águilas Verdes, celebrado no Parque Natural da Serra da Enciña da Lastra, en Rubiá.
«Actividades coma esta son unha oportunidade excepcional para achegar á mocidade valores de respecto pola natureza, seguridade e colaboración», subliñou Santos. «O labor da Garda Civil, tanto na intervención como na divulgación, é fundamental para previr riscos e concienciar sobre a importancia de coidar o noso entorno natural».
O subdelegado salientou que esta iniciativa se enmarca no Plan Director para a convivencia e mellora da seguridade nos centros educativos, unha estratexia do Ministerio do Interior que, segundo apuntou, «é unha ferramenta imprescindible, porque ten a capacidade real de chegar á xente nova desde a proximidade, o exemplo e a confianza».
Durante a exhibición, os máis pequenos puideron coñecer de primeira man o traballo dos corpos especializados da Garda Civil: desde os protocolos de actuación en situacións de emerxencia ata a vixilancia ambiental e a loita contra os delitos ecolóxicos. Para moitos, foi a primeira vez que viron en acción aos profesionais que garanten a súa seguridade no monte.
Santos tamén aproveitou a ocasión para felicitar ao grupo Águilas Verdes pola organización do campamento e pola súa aposta en dar visibilidade a un espazo natural único: «A Serra da Enciña da Lastra é un tesouro de biodiversidade e paisaxe que temos a obriga de protexer, e iniciativas como esta son fundamentais para que a nosa mocidade coñeza e valore o seu patrimonio natural».
O IV Campamento de Espeleoloxía Infantil Águilas Verdes continúa así a consolidarse como unha proposta educativa, deportiva e ambiental de referencia, que combina aprendizaxe, contacto coa natureza e experiencias inesquecibles para os máis pequenos.
