Nin misa, nin artesáns, nin comida popular no Poulo do Couso pero si en Biobra. Estaba todo preparado no Poulo do Couso para revivir a romaría que desde 2003 deixara de facerse no lugar, pero a tormenta non o permitiu. Os artesáns, a música e a comida trasladouse ao polideportivo de Biobra para asegurarse que a tormenta non desfixera a festa.
No Poulo do Couso facíase a romaría e en Vilar de Silva a misa do Pai Eterno porque en Biobra non había a imaxe, esta estaba na aldea veciña. Desde o 30 de maio de 1988 Biobra ten a súa propia imaxe obra do artista valdeorrés Cochorro, feita por encargo do pueblo tal como reza aos seus pés, «propiedad del pueblo de Biobra», dixo Rosa unha veciña que asistía á misa.
Conta Rosa que «Biobra non tiña a figura do Padre Eterno, nos faciamos unha romaría no lugar coñecido como o Poulo do Couso. Pero, como Biobra non tiña a imaxe e Vilar de Silva si, o que se facía era ir á misa a Vilar de Silva e despois os pueblos iamos ao Poulo do Couso ao baile da orquestra e a comer».
Iamos as familias, soliase xuntar máis xente que na casa e levabamos a merenda. Era un acto moi bonito porque non só estabamos os de Biobra tamén ían os do Castelo, os de Vilar de Silva, Os de Cobas; era como o centro de reunión de todos os veciños da zona, e así pasabamos o día do Padre Eterno», recorda Rosa.
«Había moi boa relación entre os pueblos, moi boa veciñanza entre todos. Todos nos coñeciamos, comiamos e logo bailabamos», apunta.
Do Poulo a Biobra
Tanto a misa, como a comida popular, como a feira de artesanía trasladouse a Biobra. A primeira fíxose na igrexa e as dúas seguintes no pavillón polideportivo.
Sete artesáns da comarca ofreceron os seus produtos: Spoombini, Licores Barbudos, El Desván de calcetines, Trastos, Amizade, Asociacion de veciños O Regueiral e Artesanía Enxebre...
Tras a sesión vermú comezou o xantar popular e logo baile. Non puido ser no Poulo do Couso pero finalmente Biobra festexou o Padre Eterno.
