Todo comezaba hai 400 anos, cando o Bispo de Astorga, Alonso Messía de Tovar, mandou construír un santuario tras unha curación milagrosa atribuída á Virxe das Ermidas. Co paso do tempo converteuse nun dos centros de peregrinación máis importantes do noroeste peninsular.
Con motivo desta celebración, desde o Concello do Bolo decidiron facer unha programación especial para conmemorar o aniversario. Estes actos comezaron o dous de maio.
Continuando con esta programación, o próximo 3 de agosto Xoán Curiel ofrecerá un concerto para presentar o seu sétimo disco na ermida. O recital comezará ás 19:00.
No caso de querer participar nesta actividade será necesario chamar ao teléfono da guía turística. «Polo que me din xa hai arredor de 40 persoas», explica o alcalde Alberto Vázquez. Ao recinto poden acceder entre 70 e 80 persoas.
Más actividades
As actividades continuarán o 22 de agosto cunha andaina en conmemoración da curación milagrosa. A idea que teñen dende o equipo de goberno é «facer unha peregrinación de acción de gracia».
Comezaría no pobo de San Miguel de Bidueira, ás 9:00, ata o Santuario. Aquelas persoas interesadas que desexen ir en autobús ata o punto inicial da ruta, «o Concello facilitará transporte que sairá ás oito da mañá». Para optar a este servizo é necesario pórse en contacto coa guía turística.
