A Deputación de Ourense promove a provincia como destino turístico de calidade na Feira Internacional de Turismo de Interior (Intur 2024) en Valladolid, destacando por primeira vez unha promoción conxunta pioneira de 18 empresas turísticas ourensás a través do Inorde.
O obxectivo desta acción é fortalecer a presenza de Ourense nos mercados de proximidade, promovendo servizos e produtos turísticos singulares da provincia. A colaboración coa Axencia Galega de Turismo permite impulsar a oferta turística ourensá, adaptándoa a novas demandas e brindando soporte ás iniciativas empresariais locais.
O Concello do Bolo participa nas sesións para profesionales B2B da feira de turismo interior Intur en Valladolid, a través do Inorde. Ademais estreou un código QR no que se facilita a información máis significativa do concello como é o entorno natural, histórico e paisaxístico das Ermitas, pondo o enfoque no santuario, o Castelo, o museo de Yosso ou a gastronomía e a etnografía do lugar.
Intur B2B é un evento especializado dentro de Intur cuxas siglas significan «business to business», é dicir, negocios entre empresas. Este formato está deseñado para facilitar reunións e contactos comerciais entre profesionais do sector turístico, como operadores turísticos, axencias de viaxes, empresas de aloxamento, e outros provedores de servizos turísticos.
A técnico de turismo do Concello do Bolo e informadora turística, Soledad Figueroa, tivo a oportunidade de programar reunións con interlocutores que puideran ter intereses comerciais para o ente local e promover así o turismo na zona. Ademais apoiouse nun vídeo promocional feito para esta ocasión.
Os informadores turísticos como Figueroa encárganse de distribuír información detallada sobre as comarcas, destacando elementos identitarios da provincia como o termalismo, a gastronomía, o patrimonio, a paisaxe e o enoturismo. Deste xeito, Ourense busca consolidarse como un referente no turismo de interior, ofrecendo experiencias únicas que combinen tradición, innovación e sustentabilidade.
A iniciativa da Deputación busca conectar as empresas locais con maioristas de viaxes de nove países, incluíndo España, Portugal, Estados Unidos, Brasil, Bélxica, China, Alemaña, Polonia e Italia. Grazas a este esforzo, os emprendedores da provincia acadaron ata 150 citas de negocios na xornada previa ao evento.
Durante os días da feira, o expositor da Deputación de Ourense busca atraer a milleiros de visitantes, especialmente axencias de viaxes de Castela e León, promovendo recursos destacados como a Vía da Prata e os ecobarcos, dentro do marco do proxecto "Ourense Termal". A área dedicada ao Camiño Mozárabe-Vía da Prata, financiada polo programa Interreg Camino Vertical, ten como finalidade animar aos asistentes a descubrir esta ruta de peregrinación.
Outro dos atractivos do expositor é a experiencia inmersiva dunha visita virtual polos canóns do Sil na Ribeira Sacra, así como a promoción do patrimonio etnográfico, con especial énfase nas máscaras do Entroido e nos pobos con encanto da provincia. Ademais, dentro do Plan de Sustentabilidade, preséntanse diversas iniciativas que poñen en valor a riqueza natural e cultural de Ourense.
