O Bolo volveu mirar este 14 de agosto cara ao seu pasado medieval coa celebración da IV Feira Irmandiña, unha cita que pechou a súa cuarta edición cun balance moi positivo por parte do Concello e cunha importante participación ao longo dunha xornada na que o castelo e a súa contorna volveron ser o gran escenario.
Artesanía, produtos locais, gastronomía e recreación histórica mesturáronse nunha feira que busca precisamente iso: achegar a historia ao público dunha maneira participativa, facendo que por unhas horas o patrimonio deixe de ser unicamente algo que contemplar para converterse tamén en algo que vivir.
Carlos Xabier Ares, pregoeiro da cuarta edición
Un dos momentos destacados da xornada foi o pregón de Carlos Xabier Ares, encargado este ano de abrir oficialmente unha Feira Irmandiña que continúa medrando e consolidándose dentro da programación estival do municipio.
Na inauguración estiveron tamén o subdelegado do Goberno en Ourense, Eladio Santos; o delegado territorial da Xunta, Manuel Pardo; o alcalde do Bolo, Miguel Ángel García; o alcalde do Barco, Aurentino Alonso, ademais doutros representantes municipais.
A partir de aí, a actividade trasladouse ao recinto da feira, onde os postos de artesanía e produtos locais compartiron espazo coas diferentes propostas de ambientación e recreación histórica.
Nesta cuarta edición tivo un papel especial o Museo Vivo da agrupación Palla Aurea, que contribuíu a trasladar aos visitantes a outros tempos e a reforzar esa vertente divulgativa e histórica que caracteriza a celebración.
Unha feira para mirar, pero tamén para participar
Porque a Feira Irmandiña do Bolo non pretende que quen se achegue ata ela sexa unicamente espectador. Unha das imaxes que volveu deixar esta edición foi precisamente a de numerosos asistentes vestidos de época, integrándose na ambientación medieval e contribuíndo a transformar por completo a contorna do castelo.
Ese espírito participativo tivo o seu reflexo no II Concurso de Vestimenta de Época Medieval, con categorías infantil e adulta.
A entrega dos agasallos aos mellores traxes serviu precisamente para poñer o punto final á cuarta edición da Feira Irmandiña. Os premios foron doados polos propios feirantes, un xesto que o Concello quixo agradecer xunto coa implicación de todas as persoas que colaboraron e participaron na celebración.
Tamén a gastronomía formou parte da xornada, este ano cunha fórmula diferente. Fronte á comida colectiva organizada noutras edicións, os visitantes puideron elixir entre a pulpeira instalada no recinto e as diferentes propostas dos postos, sen necesidade de realizar reserva previa.
A cuarta Feira Irmandiña despediuse así despois de todo un día arredor da historia, do patrimonio e da convivencia, coa fortaleza do Bolo novamente como pano de fondo e cunha celebración que consegue que veciños e visitantes non só se acheguen ao pasado medieval da vila, senón que, por unhas horas, formen parte del.
