Penélopes que xa non esperan en silencio, Circes afastadas dos vellos estereotipos e mulleres libres, diversas e donas de si mesmas tomaron estes días o Malecón do Barco de Valdeorras. Fixérono a través dunha exposición elaborada por alumnado de distintos centros educativos de Valdeorras dentro do traballo conxunto que desenvolven, dende hai anos, os equipos de dinamización lingüística da comarca.
A proposta deste ano xira arredor de “Circe ou o pracer do azul”, da escritora Begoña Caamaño. Segundo explicou Marta Cortés, a iniciativa busca reinterpretar personaxes femininas da mitoloxía clásica desde unha mirada diferente á tradicional. «Non son mulleres tipo da literatura clásica, senón mulleres libres, empoderadas, donas de si e diversas», sinalou durante a presentación.
Cada alumna e alumno, coa axuda do profesorado, versionou unha destas figuras femininas nunha exposición que mestura arte, literatura e lingua. A mostra inclúe biografías escritas a man —nunha reivindicación tamén da escritura manual en plena era dixital— xunto con detalles relacionados coa mitoloxía grecolatina e grandes cabezas decorativas que representan estes personaxes.
A instalación xoga ademais coa idea do tear de Penélope. Marta Cortés definiu toda a exposición como «un gran tear», facendo referencia á figura mitolóxica que tecía e destecía para atrasar o seu destino.
Dende a organización aproveitaron tamén para facer un chamamento ao civismo. Cortés lembrou que nos últimos anos sufriron actos vandálicos e roubos dalgúns elementos expostos, algo que provoca «moito desgusto», especialmente entre os nenos e nenas que participan no proxecto. Por iso pediu á cidadanía que goce da mostra, pero que tamén a respecte: «Que desfrute e, por favor, que respecte».
A exposición permanecerá instalada no Malecón, un espazo que consideran perfecto para dar visibilidade a este tipo de iniciativas por tratarse dunha zona céntrica e moi transitada. Este ano, ademais, confían en que a vídeo vixilancia instalada na zona axude a evitar danos e permita que as pezas permanezan expostas, cando menos, ata despois da celebración das Letras Galegas. «A ver se as cámaras disuaden», apuntou Marta Cortés.
