O Día de Todos os Santos en Valdeorras está marcado por unha tradición que perdura no tempo: a de decorar as tumbas dos seres queridos con flores. Aínda que os costumes mudaron co paso dos anos, o espírito de honrar a memoria dos que se foron permanece intacto. María González, xerente de "Pelo, Pico, Planta", ten unha visión moi especial sobre esta evolución, reflectida nos arranxos florais que enchen de cor e beleza os cemiterios.
«A xente ten o gusto máis refinado, por dicilo dunha maneira», comenta María. Ela lembra como cando era nena as familias recollían unhas poucas flores –gladiolos, azucenas, margaritas– e mesturábanas cun pouco de verde para confeccionar na casa. Aqueles tempos, marcados pola sinxeleza, contrastan co que se vive hoxe en día, onde os valdeorreses buscan algo máis elaborado e sofisticado, capaces de transmitir todo o amor e a lembranza polos seus seres queridos.
María lembra como era a tradición cando ela era nena: «O que se facía era buscar unhas flores, que aínda se segue facendo, como cravos e un pouco de verde, e confeccionábase en casa. Usábanse os típicos gladíolos, azucenas, margaritas… e facíase de forma caseira». Con todo, recoñece que os tempos cambiaron, e agora a comodidade prima: «Quizais polo mundo tan estresante no que vivimos, fixémonos máis cómodos, por así chamalo, e búscase ter o traballo rematado. Unha vez que o probas, ao ano seguinte volves a recorrer ao mesmo».
O caravel segue sendo o gran protagonista, aínda que outras opcións gañan terreo. A paniculata tamén é moi pedida porque é un acompañamento perfecto para calquera flor. María sinala que as flores exóticas están a gañar popularidade: «Sobre todo, falo por min, porque me gusta experimentar, e a xente coñéceas a través de min. Ademais, teñen unha vida longa, podendo aguantar un mes ou máis».
En canto ao gasto medio dos clientes nesta época, María estima que ronda os 40 ou 50 euros, «ben sexa nun paquete de margaritas ou un traballo máis elaborado». A maioría dos clientes optan por arranxos para varias tumbas, o que eleva o gasto total. Para facilitar as eleccións, desde "Pelo, Pico, Planta" ofrecen asesoramento personalizado e traballan con exemplos visuais: «Temos carteis para que poidan ver como quedará. Ademais, axudamos a elixir dependendo do tipo de tumba e do lugar onde se vaia colocar».
A tendencia cara a arranxos máis traballados é un reflexo da importancia de manter viva a memoria dos seres queridos, e de facelo con opcións que luzan e perduren no tempo. «Ao final, trátase de levar un traballo que destaque, e para iso necesitamos ese contacto directo co cliente, para que todo quede correctamente», conclúe María.
Si desexa ver o vídeo completo pode facelo aquí:
