Este mércores, 18 de xuño, ás 20.00 horas, o Teatro Lauro Olmo acollerá o concerto de fin de curso do Conservatorio Profesional de Música de O Barco de Valdeorras. Un evento aberto ao público que permitirá gozar do talento do alumnado a través dunha variada mostra de estilos e formacións.
O programa comezará co conxunto infantil de grao elemental, que interpretará pezas como Welcome to the World e Portugal, ambas de Jacob de Haan, e Furioso, de Robert W. Smith. A continuación, a música moderna tomará o escenario coa actuación de Iria Rodríguez Ferrero, que combinará voz e piano para versionar Black Holes, da banda The Warning.
O Coro interpretará dúas obras de gran contraste: o Lacrimosa de Mozart e a popular peza tradicional galega Se chove. Pola súa parte, o ensemble de saxofóns ofrecerá unha viaxe musical que irá desde The Simpsons, arranxada por Philippe Marilia, ata Suite Hellenique e Pequeña Czarda, de Pedro Iturralde.
A orquestra do conservatorio tamén terá o seu momento, cun repertorio clásico que inclúe o Concerto Grosso Op. 6 de Corelli (arranxo de José Romero) e un Cuarteto Op. 2 n.º 6 de Haydn.
O peche correrá a cargo do grupo folk, que levará ao público polos sons máis enxebres con temas como Bágoas na brétema, de Emilio Mesías; Polca de Vilagarcía, de Os Campaneiros; e o coñecido Busindre Reel, de Hevia.
Unha oportunidade única para celebrar o remate do curso e recoñecer o esforzo que caracteriza o traballo diario no conservatorio barquense.
O Barco de Valdeorras33 °Ccielo claro
