O luns 23 de xuño, Viloira viviu unha tarde moi especial coa celebración da noite máis máxica do ano. A 9ª edición da Andaina Popular de San Xoán reuniu a máis de 300 persoas que quixeron gozar dunha xornada chea de actividades lúdicas, deportivas e gastronómicas. Despois de que a pasada edición se celebrase en Éntoma, este ano a festa regresou á praza José Otero Pedrayo de Viloira, onde todos os participantes disfrutaron dunha tarde inesquecible.
O programa comezou cunha proba para os máis pequenos, ata os 6 anos, que saíu ás 20:30 horas. Os nenos e nenas pasearon polos fermosos xardíns da Casa Grande e, ao rematar, regresaron á praza, onde cada un deles recibiu unha medalla por participar, o que lles fixo moita ilusión. Ás 21:00 horas, tivo lugar a proba popular, cun percorrido de 6 km desde Viloira ata a Praia do Ouro. Ao chegar, os participantes recibiron un ticket para participar nun sorteo de un xamón, e logo volveron a Viloira, completando así unha ruta chea de alegría e deporte.
Ao remate da andaina, todos os asistentes compartiron unha gran pancetada na praza, onde non faltaron tampouco premios para os participantes, entre eles o de mellor disfraz. Ademais, os bares da praza ofreceron panceta, sardiñas asadas e outras delicias para todos os que quixeron celebrar o San Xoán ao seu xeito, mesmo sen participar na andaina.
Sen dúbida, foi unha tarde máxica para gozar da noite máis especial do ano, en compañía de veciños e amigos, nun ambiente de festa e bo humor.
