O período hábil xeral para exercer a actividade cinexética en Galicia comezará o vindeiro 20 de outubro e estenderase ata o 6 de xaneiro do próximo ano, durante o que se poderá cazar os xoves, domingos e festivos, tanto de carácter estatal como autonómico, con algunhas excepcións.
Para as distintas especies de caza menor, no caso da arcea e agacha, o período xeral irá tamén do 20 de outubro ao 6 de xaneiro do ano que vén —aínda que poderá ampliarse ata o 9 de febreiro en terreos de réxime cinexético especial (RCE) que o soliciten— os xoves, domingos e festivos. Para a lebre, a tempada estenderase do 20 de outubro ao 24 de novembro de 2025, os xoves, domingos e festivos en terreos de RCE.
O período xeral na modalidade de batida para a caza do raposo abranguerá do vindeiro 1 de setembro ata o 19 de outubro e do 7 de xaneiro de 2025 ata o 9 de febreiro, os xoves, sábados, domingos e festivos.
No relativo ás especies de caza maior, os machos adultos de corzo poderán capturarse en terreos en réxime cinexético común entre o 19 de agosto e o 14 de outubro, os sábados en batida/montaría, e todos os días da semana na modalidade de axexo.
Polo que respecta ao xabaril, no réxime cinexético común o período xeral de caza abranguerá do 17 ao 31 de agosto deste ano e do 7 de xaneiro ao 23 de febreiro de 2025, os xoves, sábados, domingos e festivos; e do 1 de setembro deste ano ao 5 de xaneiro do vindeiro os sábados, nas modalidades de batida, montaría e espera. Así mesmo, no réxime cinexético especial a tempada irá do 17 de agosto ao 23 de febreiro de 2025, os xoves, sábados, domingos e festivos nas modalidades de batida, montaría e espera.
Renovada automaticamente a licencia de caza a 3.000 persoas maiores de 65 anos
Durante a súa intervención, Belén do Campo, lembrou que todas as propostas debatidas hoxe polos membros do comité serán avaliadas a continuación pola Dirección Xeral de Patrimonio Natural para a súa incorporación, se procede, na resolución anual mediante a que se regula a actividade cinexética de cara á tempada 2024-2025.
Ademais, subliñou que este ano, por primeira vez e co fin de avanzar cara á simplificación administrativa, a Xunta renovará de xeito automático as licenzas de caza de persoas maiores de 65 anos ou que estean a punto de cumprilos, un colectivo para o que, recordou, estes permisos xa son gratuítos. Polo de agora, indicou que en febreiro e no que levamos de marzo se enviaron xa case 3.000 licenzas por carta, unha medida coa que se aforran “tempo, custos e desprazamentos innecesarios aos cidadáns”.
