A Plataforma Sanitaria de Valdeorras ven de defender a praza do segundo médico do Centro de Saúde de Rubiá. Explican dende a Plataforma que «este feito é unha nova agresión aos valdeorreses que cada día que pasa soportamos peores servizos públicos», e que ven «tras a supresión dun médico de familia en A Veiga, o intento de facer o mesmo en Vilamartín e en Trives, onde quixeron desfacerse dun pediatra».
Insisten en que «a Plataforma Sanitaria de Valdeorras está cos veciños de Rubiá na defensa dos seus dereitos e apoiará tódalas medidas que consideren oportunas para non perder o segundo médico de familia». Entenden dende o organismo sanitario que para atender as necesidades «non se pode suprimir a mediciña de proximidade».
Segundo os datos que proporciona o ente comarcal, a día de hoxe en Galicia se conta cun total de 12.125 médicos en activo, sendo a terceira comunidade do Estado con menos colexiados por habitante, e cun investimento sanitario en termos reais de 397 millóns de euros menos co de 2009, e dicir un 9,3% menos. Neste contexto que califican de «emerxencia sanitaria», a Xunta de Galicia está levando a cabo «a reducción da asistencia no oriente ourensan nas comarcas que estaban integradas na suprimida Área Sanitaria de Valdeorras: Viana, terra de Trives e Valdeorras».
Argumentan que «dende a aprobación en marzo da nova Lei de Saúde de Galicia, o deterioro da asistencia sanitaria na comunidade non fai máis que aumentar co incremento da privatización dos servizos sanitarios, o desmantelamento dos hospitais públicos comarcais e a supresión das áreas sanitarias no rural, sen ter en conta o despoboamento e o envellecemento da Galicia interior».
