A Rúa prepárase para vivir un verán cheo de actividade. O Concello presentou unha programación con máis dunha trintena de propostas que combinarán música, deporte, cultura, tradición e lecer familiar durante os meses de xullo e agosto, co obxectivo de converter a vila nun punto de encontro para veciños e visitantes.
Un calendario que, tal e como explicou a alcaldesa María González Albert, responde á aposta iniciada nos últimos anos para que a actividade cultural e festiva non quede concentrada unicamente nas festas tradicionais ou na Bacofesta. «Queremos que sexa unha programación constante durante practicamente os dous meses de verán, para toda a xente da Rúa que regresa nestas datas e tamén para aqueles que nos visitan», sinalou.
O concelleiro Vicente Solarat foi o encargado de presentar unha programación que é froito de meses de traballo e de contacto con numerosos artistas e propostas. Unha axenda pensada para diferentes públicos e na que conviven grandes citas musicais, actividades deportivas consolidadas e novas experiencias.
A música terá un papel protagonista. Tras as primeiras actividades do mes de xullo, a programación continuará con propostas como a actuación de Pepe Rivas e Los Robinson, xunto á NBA, dentro da colaboración coa Asociación San Cristóbal.
As Festas de Verán chegarán os días 31 de xullo, 1 e 2 de agosto cunha programación musical que combinará grandes formatos con concertos en directo. La Misión abrirá as celebracións acompañada pola discoteca A Gramola, mentres que nos días seguintes chegarán propostas como a orquestra New York, Claxon, Cubo ou Arizona.
Non hai que esquecer que, como antesala das festas da Rúa, o 30 de xullo chegará unha nova edición —e xa van catorce— do tradicional «Encontro de Pinchadiscos», unha cita que recupera cada verán o espírito daqueles locais que marcaron unha época na vila.
A rúa Doutor Vila volverá converterse nunha pista de baile ao aire libre coa música dos DJs, encargados un ano máis de dar o pistoletazo de saída ao que xa se coñece como «O Verán da Rúa».
Haberá nomes moi vencellados á historia musical da localidade, os «pinchas» de sempre, aqueles que puxeron banda sonora a varias xeracións de rueses. De feito, Vicente Solarat lembra que este encontro chegou a reunir «entre 10 e 12 persoas» compartindo cabina e lembranzas nunha noite cargada de música e nostalxia.
O deporte tamén terá o seu espazo con citas xa consolidadas como o campus de baloncesto, que rolda as catro décadas de historia, o campionato de petanca, que continúa medrando edición tras edición, ou o tradicional torneo de tenis.
Un dos momentos máis agardados chegará os días 7 e 8 de agosto coa celebración dos Sons Urbanos e o Son da Estación, unha das citas incorporadas nos últimos anos ao calendario estival rués e que xa se converteu nun referente.
A programación continuará o 11 de agosto coas Xornadas de Folclore Internacional e terá tamén unha cita moi especial o día 12 coincidindo co eclipse solar. A Rúa será unha das localizacións privilexiadas para a súa observación e o Concello prepara unha noite especial no Aguillón baixo o nome de «Lume Celta», cun espectáculo que combinará circo, acrobacias, malabares, pirotecnia e música coa actuación de Versións Vans.
A Bacofesta volverá ser outro dos pratos fortes do mes de agosto, unindo viño, gastronomía e música. No apartado musical actuarán propostas como Picocos Band, un espectáculo que fusionará rock e gaita galega e o violinista Jorge Guillén, coñecido como «Strad, o violinista rebelde», cunha posta en escena pensada para sorprender ao público.
O cine ao aire libre e as festas de San Roque, do 21 ao 24 de agosto, completarán unha programación coa que A Rúa quere manter viva a actividade durante todo o verán.
Dous meses nos que música, cultura, deporte e convivencia volverán encher rúas e espazos públicos, convertendo o verán rués nunha invitación a saír, participar e desfrutar.
