A Consellería de Presidencia, Xustiza e Deportes vén de publicar no Diario Oficial de Galicia a asignación de novos equipos de emerxencias para concellos galegos de menos de 50.000 habitantes, mancomunidades e agrupacións municipais. Esta iniciativa, cofinanciada polo Fondo Europeo de Desenvolvemento Rexional dentro do programa operativo Feder-Galicia 2021-2027, supón un reforzo para a seguridade nas zonas rurais da provincia de Ourense.
Na Pobra de Trives, este novo equipamento inclúe un kit de material loxístico de seguridade viaria que reforzará a capacidade de Protección Civil en situacións de emerxencia, especialmente na atención a incidentes nas estradas, un recurso vital para mellorar a seguridade viaria e garantir a resposta rápida do persoal de emerxencias ante situacións críticas.
Para os concellos de Manzaneda e Petín, a dotación inclúe un completo kit de ferramentas eléctricas que permitirá responder de forma máis áxil e eficaz, incrementando a capacidade de intervención e redución de riscos para as comunidades locais nestes municipios.
Ademais, os concellos do Bolo e Larouco recibirán tendas de campaña deseñadas para emerxencias, co fin de establecer espazos de acollida e refuxio temporal en casos de evacuacións ou en situacións meteorolóxicas adversas. Serán de grande utilidade para brindar un soporte inmediato en momentos críticos.
