As familias poderán solicitar desde o 6 de xullo as novas axudas para os comedores escolares
Subtítulo
As bolsas, de 150 euros, están dirixidas ao alumnado que utiliza comedores xestionados por ANPAs, concellos e centros concertados con rendas familiares de ata 6.000 euros por persoa.
Corpo
As familias galegas poderán solicitar entre o 6 de xullo e o 6 de agosto as novas axudas da Xunta para sufragar parte do custo do comedor escolar. Trátase dunha convocatoria que se pon en marcha por primeira vez e que conta cun orzamento próximo aos tres millóns de euros.
As bolsas están destinadas ás familias con fillos e fillas que durante o curso 2025/26 utilizaron comedores escolares xestionados por ANPAs, concellos ou centros concertados. Cada axuda será de 150 euros e poderá solicitala quen teña unha renda igual ou inferior aos 6.000 euros por membro da unidade familiar.
Segundo explicou a Consellería de Educación, estas subvencións nacen co obxectivo de ampliar o apoio ás familias usuarias deste tipo de comedores, mentres que nos comedores dependentes directamente da Xunta continúan vixentes as actuais bonificacións e os prezos conxelados.
A solicitude será única para todos os fillos e fillas matriculados no mesmo centro educativo. Entre a documentación necesaria deberá presentarse un certificado da entidade que xestiona o comedor no que conste que o alumno fixo uso do servizo, o número de días asistidos, o prezo diario e o importe abonado pola familia.
Estas bolsas serán compatibles con outras axudas destinadas á mesma finalidade, sempre que a suma total non supere o custo do comedor e que a familia comunique á Xunta a percepción doutras subvencións.
A Administración galega xa anunciou que esta liña de axudas terá continuidade. Así, no curso 2026/27 crearase un segundo tramo con bolsas de 100 euros para familias con rendas de entre 6.000 e 10.000 euros por persoa.
Galicia conta actualmente cunha das redes de comedores escolares máis amplas de España, con máis de 85.000 estudantes usuarios e 432 comedores xestionados pola Xunta, nos que se serven arredor de 11 millóns de menús cada curso, ademais do apoio que a Administración autonómica presta a concellos, asociacións e ANPAs que tamén ofrecen este servizo.
