Valdeorras celebrou a noite de San Xoán con diversas actividades en distintas localidades, pero todas tiñan como protagonistas as tradicionais cacharelas, rodeadas de desexos, conxuros, rituais e, como non, sardiñas.
O Barco comezou a tarde noite do venres coa carreira e andaina popular para todos os públicos que comezaba ás 20:30 horas na Praza de Viloira.
Os circuítos contaban cun percorrido de 4,5 kilómetros que os participantes podían facer a pé ou correndo. Unha vez completado o circuíto, os corredores puideron repoñer forzas cunha pancetada. Ademais, con motivo do San Xoán, os bares da zona ofreceron sardiñas, panceta, chourizo e todo tipo de produtos tradicionais.
Arredor das 22:00 horas comezaba a actuación musical do grupo Pándega para amenizar a noite.
Antes de prender a cacharela leuse o conxuro correspondente para facer a queimada e inmediatamente despois comezou a arder a cacharela de San Xoán.
Os veciños de O Barco aproveitaron a noite máis curta do ano para purificarse, queimar a enerxía negativa e pedir desexos mentres saltaban a cacharela.
Pola súa banda, en A Rúa, a Comisión de Festas de San Roque aproveitou a ocasión para organizar unha paella popular no Campo da Festa. Máis de 200 comensais degustaron o menú composto por paella, auga, vino, bica de postre e café.
Despois da cea, a discoteca móbil Danzalia amenizou a festa posterior arredor da cacharela preparada para a ocasión.
En Vilamartín celebrarán o San Xoan hoxe sábado 24 de xuño na Praza de José Luis Núñez. Coveiros de Vilamartín, Folión Os Viticultores, Mulleres Rurais Cimadevila e o Concello de Vilamatín de Valdeorras organizan, a partires das 21:30 horas, unha comida popular de San Xoán con sardiñas, viño e postre, por un módico prezo de dous euros.