viernes. 29.03.2024
EVENTOS

Folións e cabrito no Domingo Gordo en Vilariño de Conso

Vilariño festexou o Domingo Gordo entre o son dos bombos, o xantar do cabrito e a choiva que restou visitantes a esta localidade do oriente Ourensá e fixo menos vistoso o desfile.

As 11:30 deu comezo o pregón a cargo dun home moi popular do lugar, “Antonio Marchena”, natural de Sabuguido e gran coñecedor do Entroido das Terras de Vilariño. Cos seus versos, cantos e monólogos particulares descubriu os presentes a historia dos folións e outras particularidades do Entroido. Ao remate deu comezo o desfile que con saída do Toural percorreu as rúas de pobo facendo paradas cada pouco para bailar e tocar os bombos e aixadas dunha maneira peculiar.

Seis folións do concello desfilaron pola capitalidade, Vilariño, Caniceira, O Val, Chaguazoso e Mormentelos ademais dos invitados das Terras de Trives, outro de Queixa e o de Carracedo da Serra, da Gudiña. O gandeiro Mario Nogueira tamén estivo presente, foi o encargado de pechar o desfile cos seus bois, e uns pequenos burriños que foron o centro de atención dos alí presentes.

A Choiva desluciu o desfile e algúns dos folións non chegaron o tramo final por medo a que se estragasen os traxes e as máscaras. Iso si, na praza todos fixeron a súa actuación.

As 14:30 horas, comida no pavillón onde 1.200 persoas deron boa conta do cabrito que se enxalza nesta festa que, vai pola trixésima novena edición. O menú estivo composto por empanada, chourizo, cabrito asado, bica, bebida e licores.

Non remata aquí a festa do Entroido xa que aínda queda o Martes de Entroido a queima dos lardeiros que comezará as 19:00 horas na praza de Vilariño e na que tamén farán unha ronda os fulións.

O mércores 14 as 20:00 enterro da sardiña que percorrerá as rúas da vila hasta a praza do Toural onde se lle fará o enterro a finada e logo unha boa sardiñada.

Melisa Macía, alcaldesa de Vilariño, valoraba positivamente esta edición da Festa do Cabrito e emprazaba os visitantes para o novo ano. “Todo saíu moi ben, estamos moi contentos coa organización e como se desenrolou todo. Magoa pola choiva”.

Folións e cabrito no Domingo Gordo en Vilariño de Conso