Despois de 50 anos, a Festa da Enxerta regresa ao Concello de Vilamartín

Remontámonos aos anos 60 ou 70 en Vilamartín de Valdeorras, momento no que se desfrutaba da Festa da Enxerta. Despois de moitos anos, dende o Concello queren conmemorar esta festividade. Farana coincidir co día de San Xurxo.

O que se pretende é recuperar unha tradición que tanto lle achegou o municipio. «Esta iniciativa foi moi significativa para a poboación de Vilamartín», asegura Sherezade Núñez, tenente alcalde. Segundo o que explica, é unha «mágoa que se estivera esquecendo a festa e tamén a práctica». 

Na actualidade, temos moi «interiorizado que a enxerta realízase dunha forma mecánica, pero isto non sempre foi así». Antigamente estaba a maneira manual, nela existía unha delicadeza e paixón para que saíse o mellor posible. 

«O que queremos é sacar esta festa do pasado e poñela en valor. Que os viveristas e enxertadores se sintan recoñecidos. E tamén que recorden as prácticas que facilitaron outras persoas fai anos», asegura Núñez. 

Aurelio Blanco, presidente do Instituto de Estudios Valdeorreses, colabora coa organización dando «un enfoque histórico e uns datos que proporcionan sentido a esta festa e oficio». Esta iniciativa «vámola facer coa Ruta do Viño. Eles estaban moi interesados en recuperar elementos da vitivinicultura de Valdeorras». 

Despois da demostración da enxerta manual e o pregón-coloquio, terá lugar unha cata de carácter popular. «Contaremos con Cecilia Fernández, enóloga de Valencia do Sil, para presentar unha serie de viños que estean unidos a nosa terra para fiar toda a actividade», adianta. Será o 20 de abril ás 11:00. A praza Xosé Luis Núñez será o escenario da unión do pasado e o presente. 

Se desexa escoitar a entrevista completa e non perderse nada da Festa de Enxerta, pode facelo aquí: